थ्री स्टारले संकटालाई हरायो

काठमाडौं । सहिद स्मारक 'ए' डिभिजन लिग फुटबलमा थ्री स्टार क्लबले छैटौं जित निकालेको छ ।

त्रिपुरेश्वरस्थित दशरथ रंगशालामा आइतबार संकटा क्लबलाई ३-० गोल अन्तरले हराउँदै थ्री स्टारले छैटौं जित निकालेको हो ।

थ्री स्टारको जितमा अजयी मार्टिन्सले दुई गोल गरे । सन्तोष शाहुखलले एक गोल थपे ।

खेलको ४२ औं मिनेटमा मार्टिन्सले गोल गर्दै थ्री स्टारलाई सुरुआती अग्रता दिलाएका थिए ।

खेलको ४६ औं मिनेटमा मार्टिन्सले व्यक्तिगत दोस्रो  गोल गर्दै थ्री स्टारलाई २-० को अग्रता दिलाए ।

५१ औं मिनेटमा मार्टिन्स पेनाल्टीमा चुक्दा ह्याट्रिक पूरा गर्न चुके । उनले पेनाल्टीमा बाहिर प्रहार गरे । आदित्य शाक्यको प्रहार संकटाका कप्तान कुलदीप कार्कीले हातले रोकेपछि थ्री स्टारले पेनाल्टीको अवसर पाएको थियो ।

त्यसपछि खेलको इन्जुरी समयमा सन्तोषले गोल गर्दै थ्री स्टारलाई ३-० को जित दिलाए ।

जितसँगै थ्री स्टार दोस्रो स्थानमा उक्लिएको छ । थ्री स्टारले ११ खेलमा २१ अंक जोडेको छ ।

संकटाको यो चौंथो हार हो । संकटा ११ खेलमा १५ अंक जोडेर आठौं स्थानमा रहेको छ ।