जावलाखेलले चर्च ब्वाइजलाई हरायो  

काठमाडौं । सहिद स्मारक 'ए' डिभिजन लिग फुटबलमा शीर्ष स्थानको जावलाखेल युथ क्लबले जित निकालेको छ ।

त्रिपुरेश्वरस्थित दशरथ रंगशालामा शनिबार जावलाखेलले चर्च ब्वाइज युनाईटेडलाई १-० गोल अन्तरले हराएको हो ।

जावलाखेलको जितमा एनकोटो मोसाबीले निर्णायक गोल गरे ।

खेलको ६५ औं मिनेटमा मोसाबीले एकल प्रयासमा गोल गर्दै जावलाखेललाई जित दिलाएका हुन् ।

फोडे फोफानाको पासमा मैदानको मध्ये भागबाट एक्लै अघि बढाएर पेनाल्टी बक्स बाहिरबाट मोसाबीले प्रहार गरेको लेफ्ट फुटेट सट चर्च ब्वाइजका गोलकिपर प्रिसोले रोकेपनि टाङमुनिबाट छिर्दै पोस्टको जाली चुमेको थियो । मोसाबीको यो लिगमा नवौं गोल हो ।   

निकै रोमान्चक खेलमा दुबै टोलीले थुप्रै गोलको अवसर सिर्जना गरेको थियो । तर, मोसाबीको गोल बाहेक थप गोल निस्किएन ।

खेलको दोस्रो मिनेटमा चर्च ब्वाइजका मौषम सुब्बाले पेनाल्टी क्षेत्र नजिकैबाट बाहिर प्रहार गरे ।

पाँचौं मिनेटमा जावलाखेलका फोडे फोफानाले पेनाल्टी क्षेत्र भित्रबाट बाहिर प्रहार गरे ।

१९ औं मिनेटमा जावलाखेलका एनकोटो मोसाबीको सिक्स यार्ड बक्स भित्रबाटको प्रहार पोस्ट माथिबाट बाहिरिएको थियो ।

खेलको २४ औं मिनेटमा चर्च ब्वाइजका सुबाश गुरुङको क्रसमा आशिष चौधरीको सिक्स यार्ड बक्स नजिकैबाटको फ्री हेडरले पोस्टको दिशा लिन सकेन ।

३० औं मिनेटमा जावलाखेलका फोडे फोफानाको क्रसमा हिसुब थपलियाले सिक्स यार्ड नजिकैबाट बाहिर प्रहार गरे ।

खेलको ४३ औं मिनेटमा जावलाखेलका फोफानाको पेनाल्टी क्षेत्र भित्रबाटको  प्रहार पोस्टको फ्रेममा पर्न सकेन ।

खेलको ५१ औं मिनेटमा जावलाखेलका हिसुबको प्रहार गोललाइन नजिकै रहेका चर्च ब्वाइजका विवेक पौडेलले जोगाए । त्यसपछि आएको रिबाउन्ड जावलाखेलकै फोफानालाई लाग्दै बाहिरिएको थियो ।

खेलको ५४ औं मिनेटमा चर्च ब्वाइजका सुशील शाहको फ्रिकिक पोस्ट बारको थोरै माथिबाट बाहिरिएको थियो ।

७० औं मिनेटमा चर्च ब्वाइजका रंजित सिंह पान्द्रेले सिक्स यार्ड बक्स भित्रबाट प्रहार गरेको बल जावलाखेलका गोलकिपर अनिश देउलाले मुश्किलले जोगाए ।

जावलाखेलको यो सातौं जित हो । जावलाखेलले ११ खेलमा २३ अंक जोडेको छ ।

चर्च ब्वाइज ११ खेलमा १८ अंक जोडेर दोस्रो स्थानमा रहेको छ ।

चर्च ब्वाइजको यो पहिलो हार हो ।