काठमाडौं । सहिद स्मारक 'ए' डिभिजन लिग फुटबलमा न्युरोड टिम एनआरटीले जित निकालेको छ ।
त्रिपुरेश्वरस्थित दशरथ रंगशालामा मंगलबार एनआरटीले एफसी खुमलटारलाई ३-१ गोल अन्तरले हराएको हो ।
एनआरटीको जितमा सरोज तामाङ, सन्जिब विष्ट र मोहित गुरुङले एक एक गोल गरे ।
खुमलटारका श्यामु मुर्मुले एक गोल फर्काए ।
खेलको ६५ औं मिनेटमा सरोजले गोल गर्दै एनआरटीलाई सुरुआती अग्रता दिलाएका थिए । सुशन श्रेष्ठको क्रसमा अनमार्क रहेका सरोजले हेडरमार्फत गोल गरे ।
खेलको ८२ औं मिनेटमा सन्जिबले गोल गर्दै एनआरटीको अग्रता २-० को बनाए । कृतिस रत्न छुन्जुको पासमा खुमलटारका डिफेन्डर अविशेक लिम्बुले क्लियर गर्न नसकेको बलमा सन्जिबले गोल गरे ।
खेलको ८५ औं मिनेटमा मोहितले गोल गर्दै एनआरटीलाई ३-० को अग्रता दिलाए । कृतिस रत्न छुन्जुको पासमा उनले गोल गरे ।
त्यसपछि खेलको ९० औं मिनेटमा श्यामु मुर्मुले गोल गरेपनि एनआरटी ३-१ ले विजयी भयो ।
त्यसबाहेक दुबै टोलीले गोलको केहि अवसर गुमाएको थियो ।
खेलको २३ औं मिनेटमा एनआरटीका निकोलस सङले पेनाल्टी बक्स भित्रबाट प्रहार गरेको बलले पोस्टको दिशा लिन सकेन ।
३१ औं मिनेटमा खुमलटारका अविशेक वर्माको 'लङ रेन्ज' प्रहार एनआरटीका गोलकिपर पुजन होनाले सहजै नियन्त्रणमा लिए ।
खेलको ३३ औं मिनेटमा एनआरटीका सरोज तामाङले पेनाल्टी बक्स भित्रबाट बाहिर प्रहार गरे ।
खेलको ४१ औं मिनेटमा एनआरटीकै सरोजले गोलको अवसर खेर फाले । सिक्स यार्ड भित्रबाट सरोजको फितलो फ्री हेडर खुमलटारका गोलकिपर देव लिम्बुले सहजै आफ्नो नियन्त्रणमा लिए ।
५१ औं मिनेटमा खुमलटारका स्टेफन समिरले पेनाल्टी क्षेत्र भन्दा बाहिरबाट प्रहार गरेको बल एनआरटीका गोलकिपर पुजन होनाले सहजै रोके ।
५६ औं मिनेटमा खुमलटारका मनिष थापाको क्रसमा अविशेक लिम्बुको सशक्त हेडर एनआरटीका गोलकिपर पुजन होनाले मुश्किलले जोगाए ।
खेलको ५८ औं मिनेटमा एनआरटीका सरोज तामाङले दुई डिफेन्डरबीचबाट प्रहार गरेको बल पोस्ट नजिकैबाट बाहिरिएको थियो ।
एनआरटीको यो दोस्रो जित हो । जितसँगै एनआरटी १० अंक जोडेर दशौँ स्थानमा रहेको छ ।
खुमलटारको यो छैटौं हार हो । खुमलटार १० अंक जोडेर ११ औं स्थानमा झरेको छ ।
