मछिन्द्र र एनआरटीको बराबरी

काठमाडौं । सहिद स्मारक 'ए' डिभिजन लिग फुटबलमा साविक विजेता मछिन्द्र फुटबल क्लब बराबरीमा रोकिएको छ।

त्रिपुरेश्वरस्थित दशरथ रंगशालामा शनिबार मछिन्द्रले न्युरोड टिम एनआरटीसँग १-१ गोलको बराबरी खेलेको हो ।

पहिलो हाफमा लिएको अग्रता जोगाउन नसक्दा मछिन्द्र बराबरीमा रोकिएको हो ।

खेलको ३९ औं मिनेटमा ओमालाजा नुरेन करिमले गोल गर्दै मछिन्द्रलाई सुरुआती अग्रता दिलाएका थिए । प्रसान्त अवस्थीको कर्नरमा एनआरटीका डिफेन्डरले क्लियर गरेको बलमा बक्स बाहिरबाट करिमले उत्कृष्ट भली गोल गरे ।

तर, खेलको ६७ औं मिनेटमा स्टेफन जुनियरले गोल गर्दै एनआरटीलाई १-१ गोलको बराबरीमा ल्याए । निकोलस सङले उपलब्ध गराएको पासमा जुनियरले उत्कृष्ट गोल गरे ।  

त्यसबाहेक दुबै टोलीले पाएको अन्य अवसरलाई सदुपयोग गर्न सकेनन् ।

खेलको छैटौं मिनेटमा एनआरटीका सुसन श्रेष्ठको हेडर मछिन्द्रका गोलकिपर विशाल श्रेष्ठले जोगाए । त्यसपछि आएको रिबाउन्डमा लालनुनजामाको प्रहार फेरि विशालले बचाए ।

खेलको १५ औं मिनेटमा एनआरटीका कप्तान बिक्रम धिमालले हेडर मार्फत क्लियर गर्न खोजेको बल आफ्नै पोस्टमा गएको थियो । तर, एनआरटीका गोलकिपर पुजन होनाले पन्च गर्दै जोगाए ।

खेलको २९ औं मिनेटमा आन्द्रेस नियाको पासमा आफिज ओलावालेको प्रहार पोस्ट नजिकैबाट बाहिरिएको थियो ।  

खेलको ३७ औं मिनेटमा मछिन्द्रका विमल घर्ति मगरले गोलको अवसर खेर फाले । एनआरटीका गोलकिपर पुजनलाई बिट गरेपनि विमलले ढिला प्रहार गर्दा एनआरटीका गौरव श्रेष्ठले क्लियर गरे ।

खेलको ५१ औं मिनेटमा एनआरटीका जेनिस प्रजापतिको क्रसमा लालनुनजामाको फ्री हेडर पोस्टमाथिबाट  बाहिरिएको थियो ।

खेलको ५२ औं मिनेटमा एनआरटीका जेनिसको प्रहार पोस्टमाथिबाट बाहिरिएको थियो ।    

खेलको ७९ औं मिनेटमा वान भर्सेस वानको अवस्थामा मछिन्द्रका सौरभ लिम्बुको प्रहार एनआरटीका गोलकिपर पुजनले उत्कृष्ट बचाउ गरे ।

यस बराबरीसँगै  मछिन्द्रले ९ खेलमा १३ अंक जोडेको छ । मछिन्द्र छैटौं स्थानमा रहेको छ ।

एनआरटीले ९ खेलमा ७ अंक जोडेको छ । एनआरटी ११ औं स्थानमा रहेको छ ।