मनाङ र थ्री स्टारको रोमान्चक बराबरी

काठमाडौं । सहिद स्मारक 'ए' डिभिजन लिग फुटबलमा मनाङ मर्स्याङ्दी क्लब र थ्री स्टार क्लबले रोमान्चक बराबरी खेलेका छन् ।

त्रिपुरेश्वरस्थित दशरथ रंगशालामा सोमबार मनाङ र थ्री स्टारले १-१ गोलको बराबरी खेलेको हो ।

प्रतिस्पर्धात्मक खेलमा सुरुआती अग्रता भने थ्री स्टारले बनाएको थियो ।

खेलको ७८ औं मिनेटमा सन्तोष शाहुखलले गोल गर्दै थ्री स्टारलाई सुरुआती अग्रता दिलाएका थिए । लाकेन लिम्बुको हेड पासमा पेनाल्टी क्षेत्रभित्र रहेका सन्तोषले उत्कृष्ट गोल गरे ।

सात वर्षपछि थ्री स्टार फर्किएका सन्तोषले पहिलो खेलमै गोल गरेका हुन् । उनी लिगका लागि जापानबाट नेपाल आएका हुन् ।  

तर, खेलको ८४ औं मिनेटमा कोफी टिमोथी कुडोले गोल गर्दै मनाङलाई १-१ गोलको बराबरीमा ल्याए । उनले विशन गुरुङको लामो पासमा हेडमार्फत गोल गरे ।

त्यसबाहेक दुबै टोलीले पाएको अन्य अवसरलाई खेर फालेका थिए ।

खेलको १२ औं मिनेटमा थ्री स्टारका दिपेश घलेले उपलब्ध गराएको पासमा सन्तोष शाहुखलले पेनाल्टी क्षेत्र भित्रबाट प्रहार गरेको बल मनाङका गोलकिपर तथा कप्तान दीप कार्कीले सहजै आफ्नो नियन्त्रणमा लिए ।

२६ औं मिनेटमा थ्री स्टारका आदित्य शाक्यको प्रहार पोस्टमाथि बाहिरिएको थियो ।

पहिलो हाफको इन्जुरी समयमा मनाङका कमल थापाको उत्कृष्ट फ्रिकिक थ्री स्टारका गोलकिपर ताहा मोहमदले पन्च गर्दै गोलको खतरा टारेका थिए ।

खेलको ५३ औं मिनेटमा थ्री स्टारका विराज महर्जनको फ्रिकिकमा योगेश गुरुङको फ्री हेडर मनाङका गोलकिपर दीप कार्कीले जोगाए ।

यस बराबरीसँगै मनाङले ७ खेलमा १५ अंक जोडेको छ ।

मनाङ शीर्ष स्थानमा रहेको छ ।

थ्री स्टारले ११ अंक जोडेको छ । थ्री स्टार छैटौं स्थानमा रहेको छ ।