काठमाडौं । साविक विजेता मछिन्द्र फुटबल क्लबले सहिद स्मारक 'ए' डिभिजन लिग फुटबलमा दोस्रो जित निकालेको छ ।
त्रिपुरेश्वरस्थित दशरथ रंगशालामा आइतबार संकटा क्लबलाई २-१ गोल अन्तरले हराउँदै मछिन्द्रले दोस्रो जित निकालेको हो ।
मछिन्द्रको जितमा विमल घर्ति मगर र आफिज ओलावालेले एक एक गोल गरे ।
संकटाका लागि मनिष डाँगीले एक गोल फर्काए ।
खेलको २० औं मिनेटमा विमलले गोल गर्दै मछिन्द्रलाई सुरुआती अग्रता दिलाएका थिए ।
तर, २२ औं मिनेटमा मनिषले गोल गर्दै संकटालाई १-१ गोलको बराबरीमा ल्याए ।
त्यसपछि खेलको ४६ औं मिनेटमा ओलावालेले गोल गर्दै मछिन्द्रलाई २-१ को जित दिलाए ।
यस्तै खेलको इन्जुरी समयमा मछिन्द्रका छिरिङ गुरुङ घाइते हुँदै मैदानबाट बाहिरिए । आफ्नै टोलीका पुजन उपरकोटीसँग ठोक्किन पुग्दा उनले चोट बोकेका थिए । उनलाई मैदानमै सीपीआर दिईएको थियो र अस्पताल लगिएको थियो । उनी खतरामुक्त रहेका छन् ।
जितसँगै मछिन्द्रले ७ खेलमा ९ अंक जोडेको छ । मछिन्द्र नवौं स्थानमा उक्लिएको छ ।
संकटाको यो दोस्रो हार हो । संकटा ९ अंक जोडेर सातौं स्थानमा रहेको छ ।
