काठमाडौं । खेलकुद पोशाक कम्पनी उम्ब्रोको 'रोड टु वेस्ट ह्याम' अभियानको दुई भाग्यशाली विजेताको घोषणा भएको छ ।
उम्ब्रो नेपालको आधिकारिक बिक्रेता भाटभटेनी होल्डीङ्स कम्पनीले आइतबार लक्की 'ड्र' को आयोजना गर्दै दुई भाग्यशाली विजेताको घोषणा गरेको हो ।
भक्तपुरका अनमोल श्रेष्ठ र पोखराका सुजन रेग्मी 'रोड टु वेस्ट ह्याम' अभियानको विजेता बनेका छन् ।
दुई भाग्यशाली विजेताले इंग्लिस प्रिमियर लिग अन्तर्गत वेस्ट ह्याम युनाईटेड र म्यानचेस्टर युनाईटेडबीचको खेल हेर्न पाएका छन् । लण्डन स्टेडियममा आगामी मे ७ मा वेस्ट ह्याम र युनाईटेडबीचको खेल हुनेछ ।
यस्तै विजेताले काठमाडौं देखि लण्डनको दुईतर्फी टिकट र लण्डनमा रहदा ३ रात र ४ दिनको आवास सुविधा पाएका छन् ।
उम्ब्रोको समान खरिद गर्ने व्यक्तिहरुलाई यस अभियानको लक्की 'ड्र' मा सामेल गराईएको थियो ।
रोड टु वेस्ट ह्याम अभियान जनवरी २७ बाट सुरु भएर मार्च ३० सम्म चलेको थियो । ५ हजार वा सो भन्दा बढी रकमको समान खरिद गर्ने ग्राहक यस अभियानमा सामेल भएका थिए ।
लक्की ड्र प्रतियोगितामा ६०० जना खरिदकर्ता सहभागी भएका थिए ।
नेपाल राष्ट्रिय पुरुष फुटबल टोलीका फरवार्ड अन्जन विष्ट र मिडफिल्डर एरिक विष्टले विजेताको छनोट गरेका हुन् ।
उम्ब्रो नेपालका समानहरु उपत्यकाका ८ र उपत्यका बाहिरका ६ भाटभटेनी सुपरमार्केटमा किन्न सकिनेछ ।
उम्ब्रो प्रिमियर लिग क्लब वेस्ट ह्यामको प्रायोजक समेत हो । उम्ब्रो नेपालले नेपाली राष्ट्रिय महिला फुटबल टोलीका मिडफिल्डर प्रिती राईलाई प्रायोजन गरेको छ ।
अन्तराष्ट्रिय ब्राण्ड उम्रोको नेपालको आधिकारिक बिक्रेता भाटभटेनी होल्डिङ्स रहेको छ । उम्रोका सामानहरु देशभरका भाटभटेनी सुपर मार्केटका स्टोरमा उपलब्ध छन् ।
