काठमाडौं । राष्ट्रिय खेलकुद परिषद (राखेप) ले खेलकुद पूर्वाधार नीति संवाद कार्यक्रम आयोजना गर्ने भएको छ ।
राखेपले बुधबार पत्रकार सम्मेलन गर्दै यहिँ चैत १८ गते शनिबार खेलकुद पूर्वाधार नीति संवाद कार्यक्रम आयोजना गरिने जनाएको छ ।
प्रधानमन्त्री पुष्पकमल दाहाल प्रचण्डले उद्घाटन गर्ने एकदिने कार्यक्रम र्याडिसन होटल काठमाडौंमा हुनेछ । कार्यक्रममा राखेपले खेलकुद पूर्वाधारको विषयमा प्रस्तुति दिनेछ । त्यसपछि विवध विषयमा छलफल हुनेछ ।
यस कार्यक्रमको उदेश्य मापदण्ड सहितका पूर्वाधार निर्माणको नीति निर्माण गराउने, खेल पूर्वाधारको स्तर निर्धारणको मापदण्ड तयार गर्ने, खेलकुद पूर्वाधारको वर्तमान अवस्था, पूर्वाधारका लागि लगानीको अवस्थाको बिषयमा जानकारी दिने, खेल पूर्वाधारको वर्तमान अवस्थाबारे प्रकाश पार्ने लगायत रहेको राखेपले जनाएको छ ।
कस्ता पूर्वाधार संघ, प्रदेश र स्थानिय तहमा हुनु पर्ने भन्ने बिषयमा मापदण्ड बनाउन आवश्यक भएकोले, संघ, प्रदेश र स्थानीय तहमा आवश्यक पर्ने पूर्वाधारको विषयमा जानकारी लिन, पूर्वाधार निर्माणमा लगानीका विषयमा छलफल गर्न, खेल पूर्वाधारमा राज्यको अवधारणा र प्रतिबद्दताका लागि, पूर्वाधार निर्माणमा लागानी वृद्धि गराउन, नीजि क्षेत्रलाई पनि खेलकुद पूर्वाधारमा उत्प्रेरित गर्न र भौगोलिक अवस्थितिका आधारमा पूर्वाधार निर्माणको नीति तयार गर्न यस कार्यक्रमको आवश्यकता रहेको राखेपले जनाएको छ ।
नेपालको खेलकुद पूर्वाधार विकासका लागि छलफलको अनुभूति भएको कारण यस कार्यक्रम आयोजना गर्न लागिएको राखेपका सदस्य सचिव टंकलाल घिसिङले जानकारी दिए । यस संवादले नेपाली खेलकुदमा महत्वपूर्ण योगदान मिल्ने उनले बताए ।
'यस छलफलको अनुभूति भएकाले कार्यक्रम गर्न लागेका हौँ । देशभरका खेलकुद संरचनाको तथ्यांक पेश गर्ने र चुनौती केलाउने छौँ । पूर्वाधारको वर्गीकरण गर्ने छौँ । यस छलफल र संवादले नेपाली खेलकुदमा महत्वपूर्ण योगदान मिल्ने छ,' सदस्य सचिव घिसिङले भने ।
सदस्य सचिव घिसिङले यस कार्यक्रमले नेपालमा स्पोर्ट्स इन्डोर हल किन बनेन भनेर सरकारलाई ध्यानाकर्षण गराउने बताए ।
कार्यक्रममा युवा तथा खेलकुद मन्त्री, युवा तथा खेलकद मन्त्रालयका सचिव, सहसचिव, अर्थ मन्त्रालयका सचिव, बजेट योजना महाशाखाका सहसचिव, शिक्षा मन्त्रालयका सचिव, विद्यालय शिक्षा महाशाखाका विभागीय प्रमुख, सातवटै प्रदेशका खेलकुद मन्त्रालयका मन्त्री, सचिव, राखेपका बोर्ड सदस्य, प्रदेश खेलकुदका सदस्य सचिव, पूर्व सदस्य सचिव, विभिन्न खेलकुद संघका पदाधिकारी, खेलाडी, उद्योग बाणिज्य महासंघका पदाधिकारी, निजी क्षेत्रका संघ संस्थाका पदाधिकारी तथा खेलकुद पत्रकारहरुको सहभागिता रहने छ ।
-1732762953.jpg)
