काठमाडौं । त्रिभुवन आर्मीका मुकेश पाल र नेपाल पुलिसकी राजपुरा पछाईले चौंथो वीर गणेशमान सिंह १० के रोड रेसको उपाधि जितेका छन् ।
दरबारमार्गस्थित शेर्पा मलमा शनिबार आयोजित प्रतियोगितामा पुरुषतर्फ मुकेश र महिलातर्फ राजपुरा च्याम्पियन बनेका हुन् ।
मुकेशले निर्धारित दुरी ३१ मिनेट २१.७६ सेकेण्डमा पूरा गर्दै उपाधि जितेका हुन् ।
एपीएफका गोपीचन्द्र पार्की दोस्रो स्थानमा रहे । साविक विजेता गोपीले ३१ मिनेट ३८.६८ सेकेण्ड दौड पूरा गरे । तेस्रो भएका आर्मीका दीपक अधिकारीले ३१ मिनेट ४७.४२ सेकेण्डमा दौड पूरा गरे ।
आर्मीका संजय श्रेष्ठ चौंथो र केन्याका सिमोन किपगेट पाँचौं स्थानमा रहे ।
महिलातर्फ उपाधि जित्ने क्रममा राजपुराले कोर्स रेकर्डसहित ३६ मिनेट ४३.२ सेकेण्डमा दौड पूरा गरिन् ।
पुलिसकै राममाया बुढाले ३७ मिनेट ५४.१५ सेकेण्डको समय निकाल्दै दोस्रो स्थान हासिल गरिन् । तेस्रो स्थानमा रहेकी एपीएफकी पुष्पा भण्डारीले ३८ मिनेट २६.०३ सेकेण्डमा दौड पूरा गरिन् ।
आर्मीका पूर्ण लक्ष्मी न्यौपाने चौंथो र एपीएफकी बिन्द्र श्रेष्ठ पाँचौं स्थानमा रहिन् ।
प्रतियोगिताको महिला र पुरुष विजेताले ६० हजार, उपविजेताले ३० हजार र तेस्रोले १५ हजार प्राप्त गरेका छन् । चौंथोले १० हजार र पाँचौंले ५ हजार प्राप्त गरेका छन् ।
कोर्स रेकर्ड बनाएका राजपुराले थप १० हजार प्राप्त गरिन् ।
विजेता खेलाडीलाई प्रमुख अतिथि तथा नेपाली कांग्रेसका नेता प्रकाश मान सिंह, नेपाल ओलम्पिक कमिटिका अध्यक्ष जीवन राम श्रेष्ठ , वीर गणेशमान सिंह स्पोर्ट्स कमिटिका संयोजक सन्जिब तुलाधर, एथलेटिक्स संघका अध्यक्ष राजिब बिक्रम शाह लगायतले पुरस्कृत गरे ।
