आर्मीलाई हराउनेमा ढुक्क थियौं - प्रशिक्षक महर्जन

काठमाडौं । सहिद स्मारक 'ए' डिभिजन लिग फुटबलमा एपीएफ क्लबले बुधबार त्रिभुवन आर्मी क्लबलाई पराजित गर्यो ।

च्यासल मैदानमा भएको विभागीय डर्बीमा एपीएफले आर्मीलाई १-० गोल अन्तरले हराएको हो ।

आर्मीलाई हराएसँगै एपीएफले लिगमा आफ्नो दोस्रो जित समेत हासिल गर्यो ।

जितपछि एपीएफका मुख्य प्रशिक्षक रत्न काजी महर्जनले आर्मीलाई हराएकोमा खुशी देखिए ।

'आर्मीलाई रोक्न सक्यौं । प्राक्टिस अनुसार सफल भयौं । जित्छौं भन्ने पक्का थियो,' उनले भने ।

एपीएफको जितमा मणि कुमार लामाले निर्णायक गोल गरे ।

महर्जनले टिमको फिनिसिङमा अझै कमजोरी रहेको बताए ।

'जितले टिमलाई मोटिभेट गरेको छ । हाम्रो टिम वर्क राम्रो छ,' उनले थपे, 'फिनिसिङमा अझै कमजोरी छ । त्यसलाई सुधार गर्छौं ।'

आर्मीका मुख्य प्रशिक्षक न्यौपानेले पाएको मौकामा चुक्दा पराजित भएको बताए ।

'उनीहरुले एक मौका पायो । त्यसलाई सदुपयोग गर्यो र जित्यो । हामीले ३ भन्दा धेरै मौका पाएका थियौं । त्यसलाई सदुपयोग गर्न सकेनौं,' न्यौपानेले भने ।

न्यौपानेले टिमका स्ट्राइकरहरु फिनिसिङमा चुकिरहेको समेत बताए ।