बल पोसेसन राख्न नसक्दा हार्यौं : मुख्य प्रशिक्षक चेत

काठमाडौं । विभागीय टोली नेपाल पुलिस क्लबले नयाँ सिजनको सहिद स्मारक 'ए' डिभिजन लिग फुटबलमा लगातार चौंथो हार व्यहोरेको छ ।

चौंथो हार व्यहोर्ने क्रममा पुलिसले मंगलबार साविक विजेता मछिन्द्र फुटबल क्लबसँग २-१ ले पराजित भएको हो ।

दशरथ रंगशालामा एक गोलको अग्रता जोगाउन नसक्दा पुलिस पराजित भएको हो ।

लगातारको हारपछि पुलिसका मुख्य प्रशिक्षक चेत कुमार घिमिरेले गोल गरेपनि बल पोसेसन राख्न नसक्दा पराजित भएको बताए ।

'पहिलो हाफमै गोल निकालेका थियौं । जसले टिम बुस्ट अप भएको थियो । अलिकति बल होल्ड गर्न नसक्दा गोल खान पुग्यौं । जसले गर्दा खेलाडीमा कन्फिडेन्स कम भयो । अर्को गोल खान पुग्यौं,' घिमिरेले भने ।

पुलिसले ४ खेलमा अंक जोड्ने सकेको छैन ।  पुलिस पुछारमा रहेको छ ।

यस्तै घिमिरेले टोलीले दोस्रो हाफमा राम्रो खेल खेलेको बताए । तर, गोल गर्न नसकेको उनले बताए ।

घिमिरेले युवा खेलाडीबीच अझै तालमेल मिलन नसकेको बताए ।

घिमिरेले विदेशी खेलाडी अनुबन्धका लागि म्यानेजमेन्ट टिमसँग कुराकानी भईरहेको बताए ।  उनले गोलकिपर बाहेक तीनै पोजिसनमा विदेशी खेलाडी अनुबन्ध गरिने बताए ।

मछिन्द्रका सहायक प्रशिक्षक सन्तोष न्यौपानेले जितकै लागि खेलेको र नतिजा आएको बताए । आफिज ओलावाले टिममा आएपछि सजिलो भएको र अझै उपाधिका लागि खेल्ने उनले बताए ।