काठमाडौं । संकटा क्लबले सहिद स्मारक 'ए' डिभिजन लिग फुटबलमा पहिलो जित निकालेको छ ।
च्यासल मैदानमा शनिबार नेपाल पुलिस क्लबलाई ३-० गोल अन्तरले हराउँदै संकटाले पहिलो जित निकालेको हो ।
संकटाको जितमा गणेश हमाल, रोशन पहरी र सुरज ज्यु ठकुरीले एक एक गोल गरे ।
खेलको १२ औं मिनेटमा गणेशले गोल गर्दै संकटालाई सुरुआती अग्रता दिलाएका थिए।
८० औं मिनेटमा रोशनले गोल गर्दा संकटा २-० ले अघि रह्यो ।
त्यसपछि खेलको ८६ औं मिनेटमा सुरजले गोल गर्दा संकटा ३-० ले विजयी भयो ।
जितसँगै संकटाले ३ खेलमा ४ अंक जोडेको छ ।
पुलिसको यो लगातार तेस्रो हार हो । पुलिसले ३ खेलमा अंक जोड्न सकेको छैन ।
