काठमाडौं । नवप्रवेशी क्लब चर्च ब्वाइज युनाईटेडले नयाँ सिजनको सहिद स्मारक 'ए' डिभिजन लिग फुटबलमा लगातार तेस्रो जित निकालेको छ ।
त्रिपुरेश्वरस्थित दशरथ रंगशालामा शुक्रबार हिमालयन शेर्पा क्लबलाई १-० गोल अन्तरले हराउँदै चर्च ब्वाइजले लगातार तेस्रो जित निकालेको हो ।
चर्च ब्वाइजको जितमा आशिष चौधरीले निर्णायक गोल गरे ।
खेलको २० औं मिनेटमा आशिषले निर्णायक गोल गरेका हुन् ।
एरिक विष्टले मध्यभागबाट उपलब्ध गराएको लामो पासमा आशिषले उत्कृष्ट गोल गरेका थिए ।
त्यसबाहेक दुबै टोलीले गोलको केहि मौका गुमाएको थियो ।
खेलको पाँचौ मिनेटमा चर्च ब्वाइजका एरिक विष्टको प्रहार हिमालयनका डिफेन्डर अमृत श्रेष्ठले गोललाइन नजिकैबाट क्लियर गरे ।
लगत्तै छैटौं मिनेटमा चर्च ब्वाइजकै आशिष चापागाईको फ्री हेडर पोस्टमाथिबाट बाहिरिएको थियो ।
खेलको २३ औं मिनेटमा चर्च ब्वाइजका मिलन राईले प्रहार गरेको बल हिमालयनका गोलकिपर विश्वास चौधरीले बचाए।
३७ औं मिनेटमा हिमालयनका शत्यम शर्माको फ्रिकिक पोस्टको टप बारमा लाग्दै बाहिरिएको थियो ।
खेलको ४५ औं मिनेटमा चर्चका आशिष चापागाईले पेनाल्टी क्षेत्रभित्रबाट बाहिर प्रहार गरे ।
खेलको ६२ औं मिनेटमा हिमालयन शेर्पाका अमृत श्रेष्ठको हेडर प्रहार चर्च ब्वाइजका गोलकिपर प्रिसोले बचाए ।
६५ औं मिनेटमा चर्च ब्वाइजका आशिष चौधरीले वान भर्सेस वानमा गोल गर्न चुके । उनको प्रहार हिमालयनका गोलकिपर विश्वास चौधरीले बचाए ।
यस्तै खेलको ७६ औं मिनेटमा हिमालयनका सत्यम शर्माको बक्स बाहिरबाट प्रहार गरेको बल चर्च ब्वाइजका गोलकिपर प्रिसोले बचाए ।
जितसँगै चर्च ब्वाइजले ३ खेलमा ९ अंक जोडेको छ ।
चर्च ब्वाइज शीर्ष स्थानमा कायम रहेको छ ।
हिमालयनको यो पहिलो हार हो । हिमालयनले ३ खेलमा ४ अंक जोडेको छ ।
