काठमाडौं । गोकर्णेश्वर नगरपालिका खेलकुद विकास समितिको आयोजनामा प्रथम गोकर्णेश्वर नगरपालिका खुल्ला आमन्त्रित तेक्वान्दो प्रतियोगिता हुने भएको छ ।
गोकर्णेश्वर नगर तेक्वान्दो विकास समितिको संयोजन र इष्टपोल उच्च मा.विको व्यवस्थापनमा भोलि शनिबार र आईतबार खुल्ला आमन्त्रण तेक्वान्दो प्रतियोगिता हुने भएको हो ।
तेक्वान्दो खेलाडीको वृत्ति विकास तथा मनोभावना उच्च बनाउने र भविष्यमा गोकर्णेश्वर नगरपालिकामा तेक्वान्दो खेलको राष्ट्रिय खेलाडी उत्पादन गर्ने लक्ष्य तथा मुल उदेश्यका साथ प्रतियोगिता आयोजना गरिएको नगरपालिकाले जनाएको छ ।
प्रतियोगितामा जम्मा १८ वटा तौल समुहको प्रतिस्पर्धा हुने बताईएको छ । जसमा पुरुष तौल समुहमा जुनियर र सिनियर गरि १० र महिला तौल समुहमा जुनियर र सिनियर गरि ८ वटा तौल समुह रहेका छन् ।
जसमा १० वटा विभिन्न स्कुल र ८ वटा विभिन्न डोजाङ गरि जम्मा ३ सय १० जना खेलाडीले प्रतियोगितामा सहभागीता जनाउने आयोजकले जनाएको छ ।
प्रतियोगीतामा बिजेता टिम पहिलो, दोस्रो र तेस्रोलाई प्रमाण पत्र, मेडल र नगद पुरस्कारको ब्यवस्था गरिएको छ भने महिला तथा पुरुष तर्फबाट उत्कृट खेलाडीलाई बेस्ट फाइटर अवार्डबाट सम्मान गरिने नगरपालिकाले जनाएको छ ।
