काठमाडौं । नयाँ सिजनको सहिद स्मारक 'ए' डिभिजन लिग फुटबल प्रतियोगिताको आज शुक्रबारबाट सुरु हुँदैछ ।
लिगको पहिलो खेलमा नवप्रवेशी एफसी खुमलटार र फ्रेन्ड्स क्लबबीच प्रतिस्पर्धा हुनेछ । दशरथ रंगशालामा हुने पहिलो खेल साँझ ५:३० बजे सुरु हुनेछ ।
तीन मैदानमा आयोजना हुने शीर्ष डिभिजनको लिग डबल राउण्ड रोबिनको आधारमा हुनेछ । लिग यस पटक दशरथ रंगशाला, एन्फा कम्प्लेक्स र च्यासल मैदानमा हुनेछ ।
यस पटकको लिगमा कुल १ सय ८२ खेल हुनेछ । लिगको प्रत्यक्ष प्रसारण स्पेस फोरके टेलिभिजनबाट हुने छ।
यस पटकको लिग विजेताले ७५ लाख , दोस्रो टोलीले ५० लाख र तेस्रो हुने टोलीले २५ लाख रुपैयाँ पाउनेछन् । फेयर प्ले टोलीले ३ लाख पाउने छन् ।
मोस्ट भ्यालुएबल खेलाडीले ३ लाख, सर्वाधिक गोलकर्ता र सर्वोत्कृष्ट गोलकिपरले २ लाख र इमर्जिङ प्लेयरले १ लाख ५० हजार रुपैयाँ पाउने छन् ।
प्रत्येक खेलको विजेता क्लबले म्याच मनीवापत ५० हजार रुपैयाँ प्राप्त गर्नेछ । बराबरी भएका दुई क्लबबीच रकम बराबर बाँडिनेछ । हरेक खेलको म्यान अफ द म्याचले १० हजार रुपैयाँ पाउनेछन् ।
खुमलटार र फ्रेन्ड्स भिड्दै
खुमलटारले पहिलो पटक शीर्ष डिभिजन लिग खेल्न लागेको हो । खुमलटार 'बी' डिभिजन लिगको उपविजेता बन्दै शीर्ष डिभिजनमा उक्लिएको हो ।
शीर्ष डिभिजनको डेब्यु खेलमा खुमलटार सुखद सुरुआत गर्न चाहन्छ । जसका लागि खुमलटारले लामो समयबाट शीर्ष लिग खेल्दै आएको फ्रेन्ड्सलाई स्तब्ध बनाउने योजनामा छ ।
खुमलटार यस पटक उपाधि जित्ने योजनामै रहेको छ । खेलाडी अनुबन्धमा समेत खुमलटार निकै आक्रमक देखिएको थियो ।
खुमलटारका सिईओ विदुर श्रेष्ठले उपाधिका लागि चुनौती दिने दाबी गर्छन् ।
'हामीले विदेशी लगायत राम्रा खेलाडीलाई अनुबन्ध गरेका छौँ र हाम्रो तयारी राम्रो भएको छ । उपाधिका लागि चुनौती दिने छौँ',प्रि-म्याचमा उनले भने ।
खुमलटारका कप्तान रेजिन सुब्बाले टोलीले राम्रो प्रदर्शन गर्नेमा आफु आशावादी भएको बताउँछन् ।
'हाम्रो युवा र अनुभवी खेलाडीहरूको संयोजनले राम्रो नतिजा दिनेछ', उनले भने।
फ्रेन्ड्स अघिल्लो सिजन मुश्किलले रेलिगेसनबाट जोडिएको थियो । यस पटक भने शीर्ष ६ मा पुग्ने लक्ष्य फ्रेन्ड्सले लिएको छ ।
फ्रेन्ड्सले अघिल्लो सिजनको तुलनामा घरेलु फुटबलमा नाम चलेका खेलाडीहरु अनुबन्ध समेत गरेको छ ।
फ्रेन्ड्सका मुख्य प्रशिक्षक उर्जन श्रेष्ठले यस सिजन शीर्ष ६ पुग्ने टोलीको लक्ष्य रहेको बताए ।
'हामीले राम्रो प्रशिक्षण गरिरहेका छौँ र केही मैत्रीपूर्ण खेल खेलेका छौँ। हामीले मैत्रीपूर्ण खेलमा गरेका सबै गल्तीहरूलाई हटाउनेछौँ र उद्घाटन खेलमा जानेछौँ,' उर्जनले भने।
फ्रेन्ड्सका कप्तान प्रकाश बुढाथोकीले पहिलो खेलको नतिजाले लिगका लागि आफ्नो लक्ष्य निर्धारण गर्ने बताए ।
'यो म्याराथन हो र हामी सुरुमा हतार गर्न चाहँदैनौं। हामीसँग सिनियर खेलाडीहरू लामो समयसम्म शीर्ष स्तरमा खेलिरहेका छन् र यसले हामीलाई फाइदा पुर्याउँछ,' उनले भने ।
1711199972.jpeg)
