काठमाडौं । विभागीय टोली त्रिभुवन आर्मी क्लबले तेस्रो संस्करणको फिफ्टिन्स रग्बी क्लब लिगको उपाधि जितेको छ ।
दशरथ रंगशालामा शनिबार भएको राउण्ड रोविन लिगको अन्तिम खेलमा गोर्खाली रग्बी क्लबसँग बराबरी खेलेपनि शीर्ष स्थानमा रहदै आर्मी च्याम्पियन बनेको हो ।
रोमान्चक खेलमा आर्मी र गोर्खालीले १९–१९ स्कोरको बराबरी खेलेको थियो । बराबरीपछि दुबै टोली समान १२ अंक हुँदा आर्मी स्कोर अन्तरको आधारमा च्याम्पियन बनेको हो ।
आर्मीले ३ खेलमा २ जित र १ बराबरीसहित १२ अंक जोड्यो । जसमा कुल १ सय ६६ स्कोर गरेको थियो ।
गोर्खालीले ३ खेलमा २ जित र १ बराबरीसहित १२ अंक जोड्यो । तर, गोर्खालीले कुल १ सय ६२ स्कोर गरेको थियो ।
प्रतियोगितामा हिमालयन रग्बी क्लबले तेस्रो स्थान हासिल गर्यो ।
शनिबार नै हिमालयनले आकाश भैरवलाई २२–१४ ले हराउँदै तेस्रो स्थान प्राप्त गरेको हो ।
