काठमाडौं । पाँचौ संस्करणको सानीभेरी मौराखारा गुरिल्ला म्याराथनको उपाधि दुर्गाबहादुर बुढा र मञ्जु रावतले जितेका छन् । रुकुम पश्चिमको सानीभेरी गाउँपालिकाले जनयुद्ध दिवसको अवसरमा आयोजना गरेको प्रतियोगितामा दुर्गा र मञ्जु विजेता बनेका हुन् ।
पुरुष तर्फको ४६ किलोमिटर दुरीको म्याराथनमा ६१ जना सहभागी थिए । दुर्गाले निर्धारित दुरी चार घण्टा ५८ मिनेटको समयमा पुरा गरे । उपाधिसँगै बुढाले एक लाख पुरस्कार प्राप्त गरे । भोजपुरका उमेश राईले पाँच घण्टा चार मिनेटको समय सहित दोस्रो र रुकुम पश्चिमका अर्जुन कुमार बस्नेत पाँच घण्टा ११ मिनेटको समय सहित तेस्रो भए । दोश्रो र तेस्रो स्थान प्राप्त गर्ने खेलाडीले क्रमैसँग ७५ हजार र ४५ हजार रुपैयाँ प्राप्त गरे ।
महिलातर्फ जुम्लाकी मञ्जु रावत प्रथम भईन् । उनले निर्धारित दुरी तीन घण्टा २४ मिनेटमा पार गरिन् । खोटाङकी प्रिया राईले तीन घण्टा ३४ मिनेटमा दुरी पार गरेर दोश्रो भईन् भने जुम्लाकी राज्य लक्ष्मी रावतले तेस्रो स्थान हात पारिन् । विजेताले क्रमश ६० हजार, ४० हजार र २० हजार रुपैयाँ प्राप्त गरेका थिए ।
जनयुद्धको स्मरण र अग्लो स्थानमा रहेको पर्यटकिय स्थलको प्रचारको लागि गाउँपालिकाले हरेक वर्ष मौराखारा गुरिल्ला म्याराथन प्रतियोगिता सञ्चालन गर्दै आईरहेको गाउँपालिका अध्यक्ष बिर्खबहादुर बिष्टले जानकारी दिए । उनका अनुसार तत्कालिन माओवादीले सञ्चालन गरेको ‘जनयुद्ध’ताका माओवादी गुरिल्लाहरु हिडेको बाटोमा धावकलाई दौडाईएको हो ।
विजेता खेलाडीलाई पूर्व अर्थमन्त्री तथा माओबादी नेता जनार्दन शर्मा प्रभावकर, राखेप सदस्य सचिव टंकलाल घिसिङ लगायतले पुरस्कृत गरेका थिए । म्याराथनको पाँचौं संस्करणको लागि राष्ट्रिय खेलकुद परिषद्ले १५ लाख र गाउँपालिकाको आठ लाख रुपियाँ सहयोग गरेका थिए ।
