लङजम्पमा सलिमलाई राष्ट्रिय कीर्तिमानसहित स्वर्ण

काठमाडौं । एपीएफ क्लबका सलिम देवानले गोल्डेन एथलेटिक्स मिट अन्तर्गत पुरुष लङजम्पमा राष्ट्रिय कीर्तिमानसहित स्वर्ण पदक जितेका छन् ।

त्रिपुरेश्वरस्थित दशरथ रंगशालामा आइतबार सलिमले ७.०९ मिटर जम्प गर्दै राष्ट्रिय कीर्तिमानसहित स्वर्ण जितेका हुन् ।

सलिमले आफ्नै नाममा रहेको ७.०६ मिटरको राष्ट्रिय कीर्तिमान भंग गरेका हुन् ।

यस अघि सलिमले नवौं राष्ट्रिय खेलकुदमा कृष्ण बहादुर गिरिको नाममा रहेको ७ मिटरको कीर्तिमान भंग गरेका थिए । गिरिले १९९९ मा पाकिस्तानको इस्लामावादमा कीर्तिमान बनाएका थिए ।

सुदिप थारुले ६.६७ मिटर जम्प गर्दै रजत र मिथुन चौधरीले ६.४३ मिटर जम्प गर्दै कास्य पदक जिते ।

महिलातर्फ लुम्बिनी प्रदेशकी निशा चौधरीले स्वर्ण पदक जितिन् । निशाले ५.५२ मिटर जम्प गरिन् ।

यस्तै पुलिसकी सिमा चौधरीले ४.८४ मिटर जम्प गर्दै रजत र  एपीएफकी रन्जिता राईले ४.६० मिटर जम्प गर्दै कास्य पदक हात पारिन् ।