एथलेटिक्स टोली बंगलादेश प्रस्थान

काठमाडौं । अन्तराष्ट्रिय बीकेएसपी कप एथलेटिक्स च्याम्पियनसिपमा सहभागी हुन नेपाली टिम बंगलादेश प्रस्थान गरेको छ । 

ढाकामा मंसिर २७ देखि २९ गतेसम्म आयोजना हुने पाँचौं संस्करणको प्रतियोगितामा सहभागीता जनाउन नेपालको एथलेटिक्स टिम बंगलादेश प्रस्थान गरको हो । 

एथलेटिक्स परिवार नेपालले पहिलो पटक संस्थागत पहलमा नेपालका एथलेटिक्स खेलाडीलाई अन्तराष्ट्रिय प्रतियोगितामा सहभागी गराएको हो । प्रतियोगितामा यू–१७ का ७ जना र चार जना अफिसियल गरि ११ जना सहभागी रहनेछ । 

प्रतियोगितामा पुष्पराज यादव, ऋषि बहादुर कुमाल, सनिल गोर्खाली, विश्वराम कुँवर, काथ्रिन बसुकला, ब्रिटिशा सिल्पकार र सिमा श्रेष्ठले नेपालको चुनौती पेश गर्नेछन् । 

एथलेटिक्स परिवार नेपालका अध्यक्ष राजन खत्रीले सहभागी खेलाडी तथा अफिसियललाई आईतबार त्रिभुवन अन्तराष्ट्रिय बिमानस्थलमा बिदाई गरेका छन् । उनले सहभागी खेलाडीलाई उच्च मनोबलका साथ प्रतियोगितामा चुनौती पेश गर्न शुभकामना दिएका थिए । 

नेपालमा ट्रयाक एण्ड फिल्डका इभेन्टहरु नभैरहेको समय खेलाडीलाई एक्सपोजर दिने उद्धेश्यले स्थापना गरिएको एथलेटिक्स परिवार नेपालले पहिलो पटक संस्थागत पहलमा स्रोतको ब्यवस्थापन गरेर खेलाडीलाई अन्तराष्ट्रिय प्रतियोगितामा सहभागी गराएको हो ।