नवौं राष्ट्रिय : शिव र निशालाई स्वर्ण

पोखरा । नवौं राष्ट्रिय खेलकुद अन्तर्गत एथलेटिक्सको २०० मिटर दौडमा एपीएफका शिवराज पार्की र लुम्बिनीकी निशा चौधरीले स्वर्ण पदक जितेका छन् ।

शिवले पुरुष र निशाले महिलातर्फ स्वर्ण जितेका हुन् ।

पोखरा रंगशालामा बिहीबार पुरुषतर्फ शिवले निर्धारित दुरी २१.९१ सेकेन्डमा पूरा गर्दै स्वर्ण जितेका हुन् ।

एपीएफकै आशिष चौधरीले २२.०५ सेकेन्डको समय निकाल्दै रजत जिते ।

कास्य जितेका आर्मीका युवराज बिकले २२.५० सेकेन्डको समय निकाले ।

महिलातर्फ लुम्बिनीकी निशाले २५.२४ सेकेन्डमा पूरा गर्दै स्वर्ण जितेकी हुन् ।

एपीएफकी रमिता कुमारी थारुले २५.९५ सेकेन्डको समय निकाल्दै रजत हात पारिन् ।

पुलिसकी लक्ष्मी साउदले २६.५२ सेकेन्डको समय निकाल्दै कास्य पदक जितेकी छिन् ।