नवौं राष्ट्रिय : एपीएफकी फुलमती र आर्मीका सोमलाई स्वर्ण

पोखरा । नवौं राष्ट्रिय खेलकुद अन्तर्गत एथलेटिक्सको महिला ८ सय मिटर दौडमा एपीएफ क्लबकी फुलमती रानाले स्वर्ण पदक जितेकी छिन् ।

पोखरा रंगशालामा बुधबार भएको दौडमा फुलमतीले निर्धारित दुरी २ मिनेट २७.३६ सेकेन्डमा पूरा गर्दै स्वर्ण जितेकी हुन्।

आर्मीकी सरस्वती भट्टराईले २ मिनेट २७.५० सेकेन्डको समय निकाल्दै रजत जितिन् ।

कास्य जितेकी आर्मीकी रेखा लिम्बुले २ मिनेट ३०.४८ सेकेन्डको समय निकालिन् ।

पुरुष ८ सय मिटरमा आर्मीका सोम बहादुर कुमालले स्वर्ण जिते ।

सोमले दुरी १ मिनेट ५४.०८ सेकेन्डमा पूरा गरे ।

पुलिसका तेज बहादुर कार्की १ मिनेट ५५.२१ सेकेन्डसहित रजत र आर्मीका सुनिल सुनारले १ मिनेट ५५.५२ सेकेन्डसहित कास्य जिते ।