नवौं राष्ट्रिय : १० हजारमा सन्तोषीलाई स्वर्ण

काठमाडौं । गण्डकी प्रदेशमा जारी नवौं राष्ट्रिय खेलकुद अन्तर्गत एथलेटिक्सको महिला १० हजार मिटरमा बागमती प्रदेशकी सन्तोषी श्रेष्ठले स्वर्ण पदक जितेकी छिन् ।

पोखरा रंगशालामा शनिबार विभागीय टोलि पुलिस क्लबकी राजपुरा पछाईलाई पछि पार्दै सन्तोषीले स्वर्ण पदक जितेकी हुन् ।

सन्तोषीले ३६ मिनेट १२.३६ सेकेन्डको समय निकाल्दै स्वर्ण जितेकी हुन् ।

स्वर्णपछि सन्तोषीले इन्जुरीका बाबजुत आफुले स्वर्ण जितेको भन्दै इन्जुरीका कारण खेल गुमाउने र अहिले डेंगु र मौसमका कारण सहभागि हुन नपाएका खेलाडीमा स्वर्ण समर्पित गर्न चाहेको बताइन्।

‘म जस्तै धेरै चाहाना भएर पनि इन्जुरीका कारण सहभागि हुन नपाएका डेंगु र ज्वराका कारण अन्तिम समयमा राष्ट्रिय खेलकुद त्याग्नु परेका सबै खेलाडीमा यो मेडल समर्पित गर्न चाहन्छु,’ सन्तोषीले भनिन् ।

सन्तोषी १३ औं दक्षिण एसियाली खेलकुद (साग) को स्वर्ण पदक विजेता खेलाडी हुन् ।

रजत विजेता बनेकी पछाईले ३६ मिनेट २९.४५ सेकेन्डमा दौड पूरा गरिन् ।

एपीएफकी पुष्पा भण्डारी तेस्रो स्थानमा रहिन । पुष्पाले ३७ मिनेट ०४.२ सेकेन्डको समय निकालिन ।