काठमाडौं । उमेर समूहको एथलेटिक्सका खेलाडीलाई लक्षित गर्दै काठमाडौंमा भोलि शनिबार 'प्लस टू फाइभ के रन' हुँदैछ ।
कखरा इभेन्टको आयोजना र एथलेटिक्स परिवार नेपालबाट सञ्चालन हुने प्रतियोगिता त्रिपुरेश्वरस्थित दशरथ रंगशालामा हुनेछ ।
आयोजकले प्रतियोगिताको सम्पूर्ण तयारी पूरा भएको एथलेटिक्स परिवार नेपालका अध्यक्ष राजन खत्रीले जानकारी दिए ।
एथलेटिक्स खेलमा उदयमान खेलाडी उत्पादन गर्ने र स्कुल कलेजमा रहेका प्रतिभावान खेलाडीलाई उत्कृष्ट प्रर्दशन गर्न मौका प्रदान गर्ने उद्धेश्यले आयोजना गर्न लागिएको प्लस टू रन ५ किलोमिटर दुरीको हुनेछ ।
प्रतियोगितामा २० वर्ष मुनिका युवा खेलाडीले सहभागिता जनाउने छन् ।
छात्र र छात्रा दुवै विधामा आयोजना हुने प्रतियोगिताको विजेतालाई ५० हजार रुपैयाँ, दोस्रो हुनेलाई ३० हजार, तेस्रो हुनेलाई १५ हजार र चौथो हुनेलाई १० हजार, पाँचौ हुनेलाई ५ हजार र छैटौदेखि दशौंसम्म स्थान हासिल गर्ने खेलाडीलाई जनही १ हजार रुपैयाँ नगद पुरस्कार प्रदान गरिनेछ ।
प्रतियोगितामा सहभागी हुने खेलाडीलाई पदक, ट्रफी र प्रमाणपत्र प्रदान गरिनेछ ।
सहभागी सबै खेलाडीलाई प्रमाणपत्र वितरण गरिनेछ ।
