काठमाडौं । एसियन मार्सल आर्ट्सको सर्वोच्च निकायएसियन मार्सल आर्ट्स गेम्स कमिटिको महासचिवमा नेपालका दिनेश शर्मा चयन भएका छन् ।
थाइल्याण्डको बैंककमा बिहिबार सम्पन्न कमिटीको बैठकले शर्मालाई महासचिवमा नियुक्त गरेको हो । यस्तै अध्यक्षमा भारतका वि.के. भरत चुनिएका छन् ।
अन्तर्राष्ट्रिय रेफ्रि एवं मास्टर समेत रहेका शर्मा नेपाल तेक्वान्दो महासंघको अध्यक्ष एवं नेपाल राष्ट्रिय मार्सल आर्ट्स गेम्स महासंघका महसचिव हुन् ।
कमिटिका अन्य पदाधिकारीहरु भने जर्मनीमा रहेको विश्व मार्सल आर्ट्स गेम्स कमिटीको अन्तर्राष्ट्रिय हेडक्वाटर्ससंगको समन्वयमा अध्यक्ष र महासचिवले चयन गर्नेछन् ।
एसियन कमिटीमा भारत, नेपाल, बंगलादेश, अफगानिस्तान, पाकिस्तान, उज्वेकिस्तान, दुबई, रसिया, टर्कि लगायतका देश आबद्ध रहेका छन् ।
