अरहान्त र कृष्णा च्याम्पियन

काठमाडौं । चौथों संस्करणको धन लक्ष्मी महर्जन मेमोरियल राष्ट्रिय स्क्वास प्रतियोगिताको उपाधि अरहान्त केशर सिम्हा र कृष्णा थापाले जितेका छन् ।

सातदोबाटोस्थित स्क्वास कोर्टमा शनिबार भएको फाइनलमा अरहान्तले अमृत थापा मगर र कृष्णाले विपना ब्लोनलाई हराउँदै उपाधि हात पारेका हुन् ।

पुरुष खुल्लामा अरहान्तले अमृतलाई ३–० को सेटमा हराए । उनले अमृतमाथि ११–४, ११–७ र ११–६ को स्कोरमा जित निकाले ।

अरहान्तले लगातार चौंथो पटक उपाधि जितेका हुन् ।  उपाधि सहित उनले २५ हजार रुपैयाँ प्राप्त गरे । दोस्रो भएका अमृतले १५ हजारमा चित्त बुझाए ।

पुरुष खुल्लातर्फ अमिर ब्लोन र दीपक थापा तेस्रो भए । उनीहरुले ९/९ हजार प्राप्त गरे ।

महिला खुल्लामा कृष्णाले विपनालाई ३–० को सेटमा हराईन् । उनले विपनालाई ११–७, ११–७ र ११–७ को स्कोरमा पराजित गरिन् । उपाधि सहित कृष्णाले १८ हजार र दोस्रो बनेकी विपनाले ११ हजार रुपैयाँ प्राप्त गरिन् । 

महिलातर्फ भावना सुनुवार र स्वस्थानी श्रेष्ठ तेस्रो भईन् । उनीहरुले ७/७  हजार प्राप्त गरे ।

जुनियर ओपन ब्वाइजको उपाधि विकाश मगरले जिते । उनले गोपाल थापालाई ८–११, ११–२, ११–९ र ११–८ को स्कोरमा हराए । विजेता विकाशले १० हजार र उपविजेता गोपालले ६ हजार रुपैयाँ प्राप्त गरे ।

तेस्रो भएका पासाङ लामा र सलिम थापामगरले ४/४ हजार प्राप्त गरे ।

५० वर्षमाथिको भेट्रान्समा सुदीपबहादुर सिंहले प्रज्वल प्रकाश प्रधानलाई हराएर च्याम्पियन बने । उनले प्रज्वलमाथि ११–५, ११–१३, ११–७ र ११–६ को स्कोरमा जित निकाले । दिलिप अधिकारी र धिर बहादुर पुन तेस्रो भए ।

मेन्स प्लेटमा प्रयाग जोशीले राज महर्जनलाई ११–७, १२–१० र १४–१२ को स्कोरमा हराउँदै उपाधि हात पारे । कमल शाक्य र जुनिल शाक्य तेस्रो भए ।

विजेता खेलाडीलाई संस्कृति पर्यटन तथा नागरिक उड्यन मन्त्री तथा नेपाल ओलम्पिक कमिटिका अध्यक्ष जीवन राम श्रेष्ठ, ललितपुर महानगरपालिकाका मेयर चिरिबावु महर्जन, नेपाल ओलम्पिक कमिटिकी महासचिव निलेन्द्र राज श्रेष्ठ,नेपाल स्क्वास रयाकेट्स संघका अध्यक्ष किशोर महर्जन र नेपाल पौडी संघका अध्यक्ष अशोक बज्राचार्य लगायतले पुरस्कृत गरेका थिए ।

कार्यक्रममा स्क्वास संघले पर्यटन मन्त्री श्रेष्ठ, ललितपुरका मेयर महर्जन र राष्ट्रिय खेलकुद परिषद (राखेप) का सदस्य सचिव टंक लाल घिसिङलाई सम्मान गरिएको थियो ।

धनलक्ष्मी महर्जन फाउन्डेसनले आयोजना गरेको प्रतियोगितामा पुरुष खुल्ला, महिला खुल्ला, मास्टर खुल्ला पुरुष ५० वर्ष भन्दा माथि, जुनियर ब्वाईज ओपन र प्लेट गरी ५  विधामा प्रतिस्पर्धा भएको थियो ।

प्रतियोगितामा १ सय बढी खेलाडीको सहभागिता रहेको थियो ।