काठमाडौं । बिहीबार मात्र अखिल नेपाल फुटबल खेलाडी संघले एन्फाको नयाँ नेतृत्वलाई ध्यानाकर्षण पत्र बुझायो । खेलाडीलाई वर्षभरी व्यस्त राख्ने गरि एन्फाको प्रतियोगिता क्यालेन्डर सार्वजनीक गर्न माग गर्दै संघले एन्फाको ध्यानाकर्षण गराएको हो ।
एन्फामा नयाँ नेतृत्व आएसँगै घरेलु लिगबारे अनेकन अनुमान र आशंका सुरु भएका छन् । धेरैको आशय छ, नयाँ नेतृत्वलाई लिग गर्न गाह्रो छ । यसको खास कारण पनि छ । मुख्य कारण एन्फा गम्भिर आर्थिक संकटमा छ । सोही कारण लिग खेल्ने क्लबले अघिल्लो वर्षकै तयारी खर्चपनि पाएका छैनन् । लिग विजेता मछिन्द्रले पुरस्कार सहित करोड बढी रकम पाउनै बाँकी छ ।
फेरी नयाँ लिग गर्न पैसा पनि चाहियो । त्यो एन्फासँग छैन । तयारी खर्च नदिए क्लब ‘डगमग’ पनि चल्दैनन् । चरम आर्थिक संकटमा फसेको एन्फाले अघिल्लो सिजनकै पैसा दिएको छैन । नयाँ सिजनको तयारी खर्च नपाए क्लब अघि बढ्ने छाँट छैन । सोही कारण यस वर्ष लिग गर्न निकै समस्या मानिएको छ ।
अर्को कुरा यस पटकको नयाँ कार्यसमितिमा ए डिभिजनका अधिकांश क्लबका पदाधिकारी चुनावमा पराजित बने ।
मछिन्द्रलाई लगातार दुई पटक च्याम्पियन बनाएका अनिल श्रेष्ठ, सर्वाधिक सफल क्लब मनाङका विजय घले, एनआरटीका सुन्दरनरसिंह जोशीले चुनावमा हारे । ए डिभिजन क्लबबाट जावलाखेल युथ क्लबका महेन्द्र क्षेत्रीले मात्र चुनाव जितेका छन् । मछिन्द्र, मनाङ, एनआरटी, संकटा सहितका अधिकांश क्लब एन्फा बाहिर छन् । अधिकांश ठुला क्लब एन्फा बाहिर भएपछि लिग सञ्चालन गर्न झनै गाह्रो पर्छ ।
‘जिल्ला त एन्फाको कार्यक्रम र बजेट आएपछि मात्र चल्ने हो । खासमा फुटबल भनेकै घरेलु लिग हो । नयाँ नेतृत्वलाई त्यही लिग गर्न गाह्रो देखिन्छ । ठुला क्लब एन्फा बाहिर भएपछि फुटबल चलाउन हरेक नेतृत्वलाई सजिलो हुदैन ।’ ए डिभिजन क्लबका एक प्रतिनिधि भन्छन् ।
एन्फाले लिग सहितको क्यालेन्डर बनाउन सञ्जिव मिश्रलाई जिम्मेवारी दिएको थियो । मिश्रले लिगको क्यालेन्डर एन्फामा बुझाईसकेका छन् । उनले आगामी जनवरी अर्थात माघपछि मात्र लिग गर्न सुझाएका छन् । डिसेम्बरसम्म विश्वकप फुटबल हुने भएकाले विश्वभर फुटबलका कुनै ठुला कार्यक्रम हुदैनन् । भदौ, असोजबाट लिग सुरु गर्ने ल्याकत एन्फाको देखिदैन ।
हुन त अघिल्लो एन्फाको कार्यसमितिले भदौबाट खेलाडी दर्ता सुरु गर्ने र असोजबाट लिग सुरु गर्ने गरि वार्षिक क्यालेन्डरको प्रचलन सुरु गरेको थियो । तर क्यालेन्डर अनुसारको लिग गर्न भने सकेन । कोभिडले फुटबलै नहुने अवस्थामा क्यालेन्डर अनुसार लिग गर्न गाह्रोनै देखिन्थ्यो । पछिल्लो सिजन ‘विकेन्ड’मा लिग गर्ने परम्पराको सुरुवात भयो । तर अन्तिम चरणका खेलहरु झारा टार्ने हिसाबले सम्पन्न गरियो । अधिकांश सिजन विकेन्ड लिग र पोखरासम्म लिगका केही चरण खेल हुँदा घरेलु लिगले फरक स्वाद पस्किएको थियो ।
तर एन्फामा नेतृत्व परिवर्तनसँगै घरेलु लिगमाथि पुन कालो बादल देखिएको छ । एन्फाको नवनिर्वाचित कार्यसमितिको बैठक साउन २ गते बस्दैछ । तर नेतृत्वले लिगको विषय एजेण्डामा राखेको छैन । अहिले खेलाडी र फुटबललाई चाहिएको सबैभन्दा मुख्य विषयनै त्यही हो । एन्फाको १२ वटा एजेण्डामा ए डिभिजन लिगको विषय नपर्दा वर्तमान नेतृत्वको प्राथमिकता के हो भन्ने प्रश्न उब्जिएको छ ।
बिहीबार खेलाडी संघले एन्फा क्यालेन्डरको माग गर्दै ध्यानाकर्षण पत्र बुझाएको छ भने उपाध्यक्ष कुमार केसीले ए, बी र सी डिभिजन लिगको विषय एजेण्डामा थप गरेर निर्णय गर्न माग गर्दै एन्फामा पत्र दर्ता गराएका छन् । दुवै पत्रको साझा निचोज लिगको मिति घोषणा गरेर घरेलु फुटबललाई व्यस्त राख्ने एन्फा क्यालेन्डरको माग हो ।
एन्फाले भदौमा हुने भनिएको फ्रेन्चाइज फुटबल एनएसएलसँगको सम्झौता रद्ध गर्ने निर्णय गरिसकेको छ । एनएसएलसँगको सम्झौता रद्ध कार्यसमिति बैठकमार्फत गर्ने गरि एजेन्डा समेत तयार गरिएको छ । घरेलु फुटबलको तालिका नहुँदा खेलाडीहरु बेरोजगार छन् । माघमा लिग गर्ने भएपछि करिब ६ महिना खेलाडीले खेल्न पाउने परिस्थिती बन्दैन । अनिश्चित भविष्यबाट पार पाउन भन्दै राष्ट्रिय टिमका केही स्टार खेलाडीले अष्ट्रेलियालाई सम्भावित गन्तव्य बनाएका छन् । निर्धारित प्रतियोगिता एनएसएलसंग सम्झौता रद्ध गर्ने निर्णय गरेर एन्फाले अझ अन्यौलता सिर्जना गरेको छ ।
नेतृत्वको ध्यान खेलाडी र कार्यक्रम भन्दा नियुक्ति र मनोनयनमा गएपछि एन्फाभित्रकै पदाधिकारीपनि असन्तुष्ट छन् । सत्तामा पुगेपनि फुटबलको फेसबुके राजनीति गर्न नछाडेका एन्फाका अन्तराष्ट्रिय सम्बन्ध विभाग प्रमुख नविन पाँडे लेख्छन्, ‘काम कुरा एकातिर कुम्लो बोकी ठिमी तिर नहोस है फुटबलका नेताहरु, पछुताउनु नपरोस । खेलाडी र खेलको विकाशको एजेन्डालाई ओझेरमा पार्ने काम नगरौं । नेपाली फुटबल कसैको पैतृक सम्पती हैन ।’
