काठमाडौं । नेपाल एथलेटिक्स संघले आयोजना गरेको ४४ औं राष्ट्रिय एथलेटिक्स प्रतियोगितामा जयरानी थारु र शिव पार्की उत्कृष्ट खेलाडी घोषित भएका छन् ।
त्रिपुरेश्वरस्थित दशरथ रंगशालामा आइतबार सकिएको प्रतियोगिता अन्तर्गत त्रिभुवन आर्मी क्लबकी जयरानी महिलातर्फ र पुरुषतर्फ एपीएफका शिव उत्कृष्ट चुनिएका हुन् ।
जयरानीले दुई राष्ट्रिय कीर्तिमानसहित ४ स्वर्ण पदक जितिन् । यस्तै एक रजत पदक प्राप्त गरिन् । जयरानीले १ सय मिटर र ४ सय मिटर हर्डल्समा राष्ट्रिय कीर्तिमान बनाएकी थिइन् ।
यस्तै जयरानीले महिला लङजम्प र ४ गुणा १०० मिटर रिलेमा स्वर्ण जित्दा ४ गुणा ४०० मिटर महिला रिलेमा रजत पदक जितिन् ।
प्रतियोगितामा शिवले ३ स्वर्ण पदक र एक रजत प्राप्त जिते । उनले १ सय मिटर,२ सय मिटर र ४ गुणा १०० मिटर रिलेमा स्वर्ण हात पारे । ४ गुणा ४ सय मिटर रिलेमा उनले कास्य पदक जिते ।
उत्कृष्ट चुनिएका जयरानी र शिवले ट्रफी प्राप्त गरे । जयरानीले दुई राष्ट्रिय कीर्तिमान वापत १० हजार नगद प्राप्त गरिन् ।
१ सय १० मिटर हर्डल्समा राष्ट्रिय कीर्तिमान बनाएका आर्मीका जीवन थारुले पनि ५ हजार प्राप्त गरे ।
प्रतियोगितामा आर्मी टिम च्याम्पियन बन्यो । आर्मीले १८ स्वर्ण, १२ रजत र ५ कास्य पदक प्राप्त गर्यो ।
एपीएफ १९ स्वर्ण,६ रजत र ८ कास्यसहित दोस्रो बन्यो । बागमती ३ स्वर्ण,२ रजत र ४ कास्यसहित तेस्रो बन्यो ।
चौंथो पुलिसले २ स्वर्ण,३ रजत र ४ कास्य जित्यो ।
कर्णालीले ३ रजत र २ कास्य जित्दा लुम्बिनीले २ रजत र ४ कास्य हात पार्यो ।
गण्डकी र सुदूरपश्चिमले समान १ रजत र १ कास्य हात पार्यो ।
प्रतियोगिता अन्तर्गत आइतबार ३ हजार मिटरमा एपीएफका गोपी चन्द्र पार्की र बागमती प्रदेशकी सन्तोषी श्रेष्ठले स्वर्ण पदक हात पारे ।
गोपीले निर्धारित दूरी ८ मिनेट २९.५ सेकेन्डमा पूरा गर्दा सन्तोषीले १० मिनेट ६.७ सेकेन्डमा पूरा गर्दै स्वर्ण पदक जितेका हुन् ।
यस्तै आर्मीका मुकेश पालले ८ मिनेट ३० ससेकेण्डमा पूरा गर्दै रजत पदक जित्दा त्रिभुवन आर्मी क्लबका दीपक अधिकारीले ८ मिनेट ३८.० सेकेण्डको समय निकाल्दै कास्य पदक हात पारे ।
महिला तर्फ स्वर्ण जितेकी सन्तोषीले यस अघि भएको १५ सय मिटरमा समेत स्वर्ण जितेकी थिइन् । ३ हजार मिटर महिलातर्फ पुलिसकी राजपुरा पछाईले १० मिनेट ८.४ सेकेण्डसहित रजत जितिन । कर्णालीकी राममाया बुढाले १० मिनेट ४१.९ सेकेण्डसहित कास्य पदक हात पारिन् ।
४ गुणा ४ सय मिटर रिले महिलातर्फ एपीएफले स्वर्ण पदक जितेको छ । रमिता कुमार थारु, भागरती कुमारी थारु, कल्पना श्रेष्ठ र फूलमती रानाको समूहले आर्मीको टोलीलाई पछि पार्दै स्वर्ण जितेको हो ।
एपीएफको टोलीले निर्धारित दूरी ४ मिनेट ३.१ सेकेन्डेमा पूरा गर्दै स्वर्ण पदक जित निकाल्दा आर्मीले ४ मिनेट ९.३ सेकेन्डको समय निकाल्दै रजत पदक हाँसिल गरेको हो । यस्तै कास्य पदक जितेको बागमती प्रदेशले निर्धारित दूरी ४ मिने ४०.९ सेकेन्डमा पूरा गर्यो ।
आइतबारकै पुरुष तर्फको ४ गुणा ४ सय मिटरमा भने आर्मीले एपिएफलाई पछि पार्दै स्वर्ण पदक जित्यो । आर्मीको समूहले निर्धारित दूरी ३ मिनेट २०.४ सेकेन्डमा पूरा गरेको हो । रजत पदक जितेको एपिएफको टोलीले निर्धारित दूरी पार गर्न ३ मिनेट २१.९ सेकेन्ड समय खर्चियो । यस्तै पुलिसले निर्धारित दूरी ३ मिनेट ३०.८ सेकेन्ड पूरा गरेर कास्य पदकमा चित्त बुझायो ।
त्रिपल जम्प महिला तर्फको प्रतिस्पर्धामा एपिएफकी शिला चौधरीले स्वर्ण पदक जित्दा पुलिसकी सिम चौधरीले रजत तथा आर्मी की निर्मला थापाले कास्य पदक जिते । शिलाले ११.०४ मिटर जम्प गर्दा सिमाले १०.५२ मिटर र निर्मला थापाले ९.८९ मिटर जम्प गरिन् ।
यस्तै पुरुष तर्फ भने बागमती प्रदेशका भुवन महतोले १३.८२ मिटर जम्प गर्दै विभागीय प्रतिस्पर्धीलाई पछि पारेर स्वर्ण पदक जिते । आर्मीका शेर बहादुर विष्टले १३.५३ मिटर जम्प गर्दै रजत पदक जित्दा सलिम देवानले १३.४४ मिटर जम्प गर्दै कास्य पदकमा चित्त बुझाए ।
डिस्कस थ्रो तर्फको प्रतिस्पर्धामा आर्मीले दुबै महिला र पुरुष तर्फको स्पर्धामा स्वर्ण पदक जित्यो । महिला तर्फको खेलमा आर्मीकी सिता शाहीले ३३.५३ मिटर थ्रो गर्दै स्वर्ण पदक जित्दा पुरुष तर्फ चित्र बहादुर वलिले ३६.८९ मिटर थ्रो गरेर आर्मीलाई स्वर्ण पदक दिलाएका हुन ।
लुम्बिनीकी संगिता अधिकारीले ३३.३८ मिटर थ्रो गर्दै रजत पदक जित्दा आर्मीकी मिलन बुढामगरले ३२.९५ मिटर थ्रो गर्दै कास्य पदकमा चित्त बुझाइन् । यस्तै ३३.१८ मिटर थ्रो गर्दै पुलिसका पुस्कल खड्काले रजत पदक प्राप्त गर्दा ३३.०५ मिटर थ्रो गरेका एपिएफका मिलन चौधरी तेस्रो भए ।
विजेता खेलाडीलाई राष्ट्रिय खेलकुद परिषदका सदस्य सचिव टंकलाल घिसिङ, युवा तथा खेलकुद मन्त्रालयका सचिव दामोदर रेग्मी, एथलेटिक्स संघका अध्यक्ष राजिव बिक्रम शाह लगायतले पुरस्कृत गरे ।
प्रतियोगितामा सात प्रदेश र तीन विभागीय टोली (आर्मी÷प्रहरी÷सशस्त्र) गरी १० टिमबाट २ सय ४० खेलाडीको सहभागि थियो।
प्रतियोगितामा ३१ स्वर्णका लागि प्रतिस्पर्धा भएको थियो ।
