एन्फाको जिल्ला निर्वाचन स्थगित

काठमाडौं । अखिल नेपाल फुटबल संघ एन्फाको जिल्ला निर्वाचन अनिश्चित समयका लागि स्थगित गरिएको छ । 

एन्फा केन्द्रिय कार्यालय ललितपुरमा बिहीबार बसेको कार्यसमिति बैठकले निर्वाचन नियमावली तयार नभएको कारण देखाउँदै जिल्ला अधिवेशन स्थगित गर्ने निर्णय गरेको हो ।

एन्फाले फागुन १५ देखि ३० गतेभित्र जिल्ला र विभिन्न संघहरुको निर्वाचन हुने गरि कार्यतालिका तयार पारेको थियो ।

एन्फा महासचिव इन्द्रमान तुलाधरले निर्वाचन नियमावली नभएका कारण अनिश्चित समयका लागि जिल्ला र विभिन्न संघको निर्वाचन स्थगित गरिएको खेलपाटीलाई बताए । 

उनले फुटबलको सर्वोच्च निकाय फिफा, एएफसीबाट स्विकृति प्रदान भएसँगै निर्वाचनको नयाँ मिति तय गरिने बताए । 
‘फिफा, एएफसी निर्देशन अनुसार निर्वाचन गर्ने भनेर निर्देशिका पास गर्यौ । तर संशोधन सहित निर्देशिका आएको छ । त्यसलाई सच्चाएर पुन पठाएका छौं । पास भएर आएपछि निर्वाचन प्रक्रिया अघि बढ्छ ।’ तुलाधरले भने ।

एन्फाले फिफा, एएफसीबाट निर्वाचन नियमावली पारित नभएका कारण तत्काल निर्वाचन गर्न नमिल्ने बताएको छ ।

‘नियमावली अनुसार निर्वाचन समिति बन्ने हो । निर्वाचन समिति नबनेसम्म निर्वाचन गर्ने अवस्था रहेन ।’ तुलाधरले भने । 

एन्फाले आगामी जेठ १५ गते संघको नयाँ नेतृत्वका लागि निर्वाचन गर्ने मिति तय गरको छ । यसअघिको कार्यसमिति बैठकले जिल्ला, संघ तथा बी र सी डिभिजनका क्लबको निर्वाचनको कार्यतालिका निकालेको थियो । 

निर्देशिका पारित नभएको कारण देखाउँदै एन्फाले विशेष साधारण सभादेखि जिल्ला निर्वाचन समेत स्थगित गरेको छ ।

जिल्ला र संघहरुको निर्वाचन स्थगित भएपनि बी, सी डिभिजनका क्लब र प्रदेश फुटबल संघको निर्वाचन भने पूर्व निर्धारित समयमै हुने तुलाधरले बताए । 

कार्यसमिति बैठकले छानविन समितिको प्रतिवेदनका आधारमा एन्फाका फाइनान्स डाइरेक्टर निरञ्जन शाहलाई कारबाही गर्ने निर्णय हो ।