खेलकुद मन्त्रीले भने, 'राखेपभित्रको खाली जमिन भलिबललाई'

काठमाडौं । युवा तथा खेलकुद मन्त्री महेश्वर गहतराजले राष्ट्रिय खेलकुद परिषद् (राखेप)भित्रको खाली जमिन भलिबल खेललाई दिने प्रतिबद्धता जनाएका छन् । 

आईतबार नेपाल भलिबल संघले आयोजना गरेको खेलाडी बिदाई कार्यक्रममा मन्त्री गहतराजले राखेपभित्र रहेको खाली जमिन भलिबललाई दिलाउन आफु लाग्ने बताए । 

'राखेपभित्र एउटा खाली जमिन रहेको थाहा पाए । शनिबार राखेपको नवनिर्मित भवनको अनुगमन गर्दा पुरानो स्विमिङ पुल भत्किएको देखेको थिए ।' उनले भने, 'मेरो कार्यकालभरी त्यो जमिन तपाईहरुलाई दिलाउन लाग्छु ।'

उनले मन्त्रीस्तरबाट हुने भए पनि मन्त्रीपरिषदबाट आवश्यक पर्ने भएपनि आफुले राखेपभित्रको जग्गा भलिबललाई उपलब्ध गराउने प्रतिबद्धता जनाए । 

'कुनै तरिका, कुन विधि र कुन प्रक्रियाले हुन्छ । त्यसको हल म गर्छु ।' उनले भने ।

नेपालको राष्ट्रिय खेल भलिबलको आफ्नै कभर्डहल छैन । कभर्ड हल नहुँदा भलिबलका खेलाडीले सुविधाजनक रुपमा प्रशिक्षण गर्न पाएका छैनन् । 

भलिबलले त्रिपुरेश्वरको कभर्डहलमा प्रशिक्षण तथा प्रतियोगिता लगायतका कार्यक्रम सञ्चालन गर्दै आएको छ । 

तर विभिन्न खेलले कभर्डहलमा प्रतियोगिता आयोजना गर्दा भलिबलको कार्यक्रम बेला बेलामा प्रभावित हुँदै आएको छ । 
संघले एकपटक मुलपानीमा समेत भलिबलको कभर्डहलका लागि जग्गा पाएको थियो । तर अन्तिम समयमा स्थानीय तहले सो जग्गा भलिबललाई दिन मानेन । 

कभर्डहलको अभावमा भलिबल खेलका प्रशिक्षण र प्रतियोगितामा गम्भिर असर पर्दै आएको छ । 

जग्गा अभावमा भलिबलका लागि सरकारले विनियोजन गरेको कभर्डहलको डीपीआर बजेट समेत फ्रिज हुँदै आएको छ । 

गत वर्ष सरकारले भलिबल कभर्डहलको डीपीआरका लागि एक करोड रुपैयाँ बजेट विनियोजन गरेको थियो । तर जग्गा प्राप्तिको काम सम्पन्न नहुँदा सो रकम फ्रिज भएको थियो । 

यस वर्ष समेत सरकारले डीपीआरका लागि ५० लाख रुपैयाँ विनियोजन गरेको छ । तर जग्गा प्राप्तिको काम सम्पन्न नहुँदा सो रकम समेत यस वर्ष ब्रिज हुने अवस्थामा छ ।