काठमाडौं । गलकोट समाज जापानले जापान व्यापी तेस्रो खुला पुरुष रनिङ कप भलिबल प्रतियोगिताको उपाधि हात पारेको छ ।
नेपाल भलिबल संघ जापानको आयोजनामा बुधबार साइतामाको तोदा स्पोर्टस हलमा भएको फाइनलमा गलकोट स्पोर्टस क्लब टोकियोलाई हराएर गलकोट समाजले उपाधि जितेको हो ।
उपाधि जित्ने क्रममा गलकोट समाजले गलकोट स्पोर्टसमाथि २५-२३ र २५-१६ को सोझो सेटमा जित निकाल्यो ।
गलकोट समाजले नारिता डिसीलाई पराजित गराउदै दोस्रो चरणमा पुगेको थियो भने स्पोर्ट्स क्लब एनबिएलाई पराजित गर्दै दोस्रो चरणमा पुगेको थियो ।
दोस्रो चरणमा बोहोराफाँट समाजसँग भिडेको स्पोर्ट्स क्लब त्यसलाई पाखा लगाएर फाइनलमा प्रवेश गरेको थियो भने गलकोट समाज जापान दोस्रो चरणमा एनवाई एससीसँग भिडेर फाइनलमा गएको थियो ।
उपाधिसँगै गलकोट समाजले ३ लाख येन नगद र ट्रफी प्राप्त गर्दा उप विजेता गलकोट स्पोर्ट्सले २ लाख येन प्राप्त गरेको छ ।
बोहोराफाट समाज जापान र एनवाई एससीले सान्त्वना पुरस्कार स्वरुप ५० /५० हजार येन नगद पाएका छन् ।
प्रतियोगितामा बोहोराफाट समाजका बसन्त कार्कीलाई वेष्ट स्पाइकर, एनवाई एससीका अभिजित रायमाझीलाई वेष्ट प्लेयर, गलकोट स्पोर्ट्स टोकियोका मनोज केसीलाई वेष्ट ब्लकर, गलकोट स्पोर्ट्स क्लब टोकियो कै अमर भण्डारीलाई वेष्ट कोच र गलकोट समाज जापान कै मनोज केसीलाई वेष्ट डिफेन्डर चुनिए । मिराई लाईफ अवार्डबाट भविन थापालाई पुरस्कृत भए ।
कार्यक्रममा पुराना भलिबल खेलाडी तथा कोच श्री गुरुङलाई सम्मान गरिएको थियो । कार्यक्रमको प्रमुख अतिथिको रूपमा रहेका एनआरएनए आइसीसी सदस्य रोबिन शेरचन र अतिथि एनआरएनए आइसीसी सदस्य तथा एनआरएनए एसिया प्यासिफिक क्षेत्रीय समितिको उप संयोजक पदका उम्मेदवार दिवल खड्काले विजयी तथा पुरस्कृत खेलाडी लगायतलाई पुरस्कार, प्रमाण पत्र वितरण र सम्मान गरेका थिए ।
