बंगलादेशमाथि पाकिस्तानको जित

काठमाडौं । पाकिस्तानले पहिलो टी-ट्वान्टी अन्तराष्ट्रियमा घरेलु टिम बंगलादेशलाई हराएको छ ।

ढाकामा शुक्रबार पाकिस्तानले बंगलादेशलाई ४ विकेटले हराएको हो ।

जितसँगै तीन खेलको सिरिजमा पाकिस्तानले १-० को अग्रता बनाएको छ ।

बंगलादेशले दिएको १ सय २८ रनको लक्ष्य पाकिस्तानले १९ ओभर २ बलमा ६ विकेट गुमाएर पूरा गर्यो ।

पाकिस्तानको जितमा फखर जमान र खुस्दिल साहले समान ३४/३४ रन बनाए ।

शादब खानले अविजित २१ तथा मोहमद नवाजले अविजित १८ रन बनाए ।

बंगलादेशका तास्किन अहमेदले २ विकेट लिए । मेहदी हसन,मुस्ताफिजुर रहमान र शोरिफुल इस्लामले १/१ विकेट लिए ।

यस अघि पहिले ब्याटिङ गरेको बंगलादेशले २० ओभरमा ७ विकेट गुमाएर १ सय २७ रन बनाएको थियो ।

बंगलादेशका अफिफ होसेनले ३६ रन बनाए । मेहदी हसनले अविजित ३० रन जोड्दा नुरुल हसनले २८ रन बनाए ।

पाकिस्तानका हसन अलिले ३ विकेट लिए । मोहमद वासिमको नाममा २ विकेट रहयो ।