पाँचपोखरी म्याराथन : दर्ताकाे समय तीन दिन थप

काठमाडौं । सिन्धुपाल्चोकमा हुने चौथो संस्करणको पाँच पोखरी विन्टर हाफ म्याराथनको खेलाडी दर्ताकाे समय ३ दिन थप गरिएको छ ।

तिहारको सार्वजनीक विदाका कारण दर्ता समय तीन दिन थप गरिएको आयोजकले जनाएको छ ।

बागमती प्रदेश खेलकुद विकास परिषद् र पाँचपोखरी थाङपाल गाउँपालिका खेलकुद विकास समिति, सिन्धुपाल्चोकको संयुक्त आयोजनामा हुने प्रतियोगितामा सहभागी हुने धावकलाई कात्तिक १९ सम्म दर्ताको समय राखिएकाे थियो ।

तिहारका कारण सार्वजनिक विदा पर्न गएकोले कात्तिक २२ गतेसम्मलाई नयाँ दर्ता मिति कायम गरिएको आयोजक समितिका अध्यक्ष टासी शेर्पाले जानकारी गराए ।

दौड कात्तिक १७ गते सिन्धुपाल्चोकको पर्यटकीय नगरी पाँच पोखरीमा हुने छ ।

बागमती प्रदेश खेलकुद विकास परिषद्ले प्रतियोगितामा सातै प्रदेशबाट खेलाडीलाई सहभागी गराउने प्रयास पनि थालेको छ । प्रतियोगितामा राष्ट्रिय स्तरका खेलाडी सहित अन्य धावकले समेत सहभागीता जनाउनेछन् ।

प्रतियाेगितामा पुरुष तथा महिलातर्फका विजेताले ५० हजार रुपैयाँ प्राप्त गर्नेछन् । पुरुष तथा महिलातर्फ दोस्रो, तेस्रो, चौथो र पाँचौ हुनेले क्रमश ३० हजार, २० हजार, १० हजार र ५ हजार प्राप्त गर्नेछन् ।

सिन्धुपाल्चोकबाट सहभागी हुने खेलाडीहरु मध्येबाट प्रथम, दोस्रो र तेस्रो हुनेलाई क्रमश १५ हजार, १० हजार र ५ हजार प्रदान गरिने बताइएकाे छ ।

भेट्रान्सतर्फ शीर्ष तीन स्थान हात पार्ने धावकहरु क्रमश १० हजार, ८ हजार र ५ हजारबाट पुरस्कृत हुनेछन् । सहभागी सबैलाई प्रमाणपत्र र मेडल उपलब्ध गराइने आयोजकले जानकारी गराएको छ ।

प्रतियोगितामा विभागीय टोली तथा व्यक्तिगत गरी करिब १ सय ५५ जना बढीले सहभागिता जनाउने छन् । आयोजकका अनुसार प्रतियोगिताका लागि करिब २१ लाख ४१ हजार खर्च हुने अनुमान गरिएको छ ।