भैरहवालाई चितवनकाे मध्यम चुनौती

काठमाडौं । चौथो संस्करणको एभरेष्ट प्रिमियर लिग (ईपिएल) टी—ट्वान्टी क्रिकेट अन्तर्गत चितवन टाईगर्सले भैरहवा ग्लाडियटर्सलाई १ सय ६५ रनको चुनौती दिएको छ ।

टियु क्रिकेट मैदानमा टस जितेर पहिले ब्याटिङ गरेको चितवनले निर्धारित २० ओभरमा ८ विकेट गुमाएर १ सय ६४ रन जोड्यो ।

चितवनको लागि करिम जनतले सर्वाधिक ३५ रनको योगदान गरे भने मोहम्मद सहजादले ३२ रन जोडे । सिकुगे प्रसन्नाले २४ रन हिर्काए । कमल सिंह ऐरी ७ रनमा अविजित रहे ।

भिस सार्की १६, राजेश पुलामी १४, दिलिप नाथ १३, देव खनाल ५ र खडक बोहरा १ रनमा आउट भए ।

भैरहवाका अविनाश बोहराले सर्वाधिक तीन विकेट हात पार्दा कुशल मल्लले दुई तथा कृष्ण कार्की, दुर्गेश गुप्ता र धम्मिका प्रसादले एक—एक विकेट लिए ।

चितवन क्वालिफायरमा प्रवेश गरिसकेको छ । चितवन ४ खेलमा ८ अंक जोडेर शीर्ष स्थानमा रहेको छ ।

भैरहवा पनि प्ले अफमा पुगिसकेको छ । भैरहवा ३ खेलमा ४ अंक जोडेर तेस्रो स्थानमा रहेको छ ।