ईपीएल : आज दुई खेल हुँदै

काठमाडौं । चौंथो संस्करणको एभरेष्ट प्रिमियर लिग (ईपीएल) टी-ट्वान्टी क्रिकेटमा आज शुक्रबार दुई खेलहरु हुँदैछन् ।

टियु क्रिकेट मैदानमा हुने पहिलो खेलमा विराटनगर वारियर्स र ललितपुर प्याट्रीयट्सबीच प्रतिस्पर्धा हुनेछ । विराटनगर र ललितपुरबीचको खेल बिहान ९:३० बजे सुरु हुनेछ ।

करण केसीको कप्तानीमा रहेको विराटनगर पहिलो जितको खोजीमा हुनेछ । विराटनगरले अघिल्ला दुई खेलमा हार व्यहोरेको थियो । विराटनगर अंक विहीन रहदै पुछारमा रहेको छ ।

कुशल भुर्तेलको कप्तानीमा रहेको ललितपुर पनि पहिलो जित निकाल्न चाहन्छ । साविक विजेता समेत रहेको ललितपुरले ३ खेलमा मात्र १ अंक जोडेको छ ।

शीर्ष चारको होड कायम राख्न ललितपुरलाई यस खेल महत्वपूर्ण रहेको छ । ललितपुर पुछारबाट दोस्रो स्थानमा रहेको छ ।

यस्तै दोस्रो खेलमा पोखरा राइनोज र चितवन टाइगर्सबीच प्रतिस्पर्धा हुनेछ।

चितवन र पोखराबीचको खेल दिउँसो १:३० बजे सुरु हुनेछ ।

सोमपाल कामीको कप्तानीमा रहेको चितवन लगातार तेस्रो जित निकाल्ने योजनामा रहेको छ । चितवनले अघिल्ला दुबै खेल जितेको थियो ।

चितवन २ खेलमा ४ अंक जोडेर चौंथो स्थानमा रहेको छ ।  

विनोद भण्डारीको कप्तानीमा रहेको पोखरा भने दोस्रो जित निकाल्न चाहन्छ । पोखराले २ खेलमा ३ अंक जोडेको छ । र, लिगको तेस्रो स्थानमा रहेको छ ।

प्रतियोगितामा ६ शहरका फ्रेन्चाइज टिमले सहभागिता जनाएका छन् ।

लिग खेलपछि शीर्ष दुई टोलीले क्वालिफायर १ मा प्रतिस्पर्धा गर्ने छन् । इलिमिनेटरमा तेस्रो र चौंथो टोलीले खेल्ने छन् ।

क्वालिफायर १ को विजेता फाइनलमा पुग्नेछ । पराजित हुने टोलीले फाइनल प्रवेशका लागि इलिमिनेटरको विजेतासँग खेल्नेछ ।

प्रतियोगिताको विजेताले ५० लाख प्राप्त गर्नेछ । यस्तै उपविजेताले १५ लाख पाउने जनाएको छ ।