समर्थकसँग दुखी छन् नेयमार

एजेन्सी । ब्राजिली स्टार नेयमारले समर्थकबाट अझ धेरै सम्मानको माग गरेका छन् ।

गत साता चिलीविरुद्ध ब्राजिलले प्राप्त गरेको १–० को जितमा नेयमारको मोटोपनलाई लिएर आलोचना भएको थियो । उनको तौल बढेको भन्दै ब्राजिली समर्थकले आलोचना गरेका थिए ।

त्यसअघि पेरिस सेन्ट जर्मेन (पीएसजी)ले रिम्सविरुद्ध प्राप्त २–० को जितमा समेत मुख्य प्रशिक्षक मौरिसियो पोचिटिनोले उनलाई दोस्रो हाफमा स्थानान्तरण गरेका थिए । उनलाई लियोनल मेस्सीले प्रतिस्थापन गरेका थिए ।

त्यसपछि २९ वर्षिय फरवार्डलाई आवश्यकता भन्दा बढी मोटाएको भन्दै आरोपित गरिएको थियो ।

बिहीबार नेयमार प्रेरित ब्राजिलले विश्वकपको छनोट खेलमा पेरुलाई २–० ले पराजित गर्यो । जसमा नेयमारले एक गोल गर्नुका साथै एक गोलको अवसर सिर्जना गरेका थिए ।

ब्राजिली सुपरस्टारलाई समर्थकले अझै आलोचना गरेका छन् ।

बार्सिलोनाका पूर्व स्टार नेयमारले आफु अझ धेरै कुराको हकदार रहेको बताएका छन् । उनले यस प्रकारको आलोचनालाई असामान्य बताएका छन् ।

‘मलाई थाहा छैन, मैले समर्थकको सम्मान पाउन यो जर्सीमा अझ कति गर्न आवश्यक छ ।’ नेयमारले भनेका छन् ।

‘यो सामान्य हैन । यो निकै लामो समयदेखि भैरहेको छ । यो रिपोर्टस, कमेन्टेटर र अरु धेरैबाट भईरहेको छ ।’

‘कुनै समय म अन्तरवर्ता दिन चाहदिन । तर म महत्वपुर्ण क्षणमा आफ्नो काम गर्छु ।’ उनले थपेका छन् ।

नेयमारले पेरुविरुद्धको गोलको खुसी मनाउँदै आफ्नो मोटोपनको आलोचना गर्नेलाई जवाफ पनि दिए । उनले सर्टमाथि निकाल्दै आफु फिट रहेको देखाएका थिए ।

सान्तोषका पूर्व खेलाडीले आफुले सर्टमाथि तानेको फोटो सामाजिक सञ्जालमा समेत हालेका छन् ।