राष्ट्रिय फुटबल टिम आज कतार जादै  

काठमाडौं । नेपाली राष्ट्रिय फुटबल टिम आज शुक्रबार कतारको दोहा प्रस्थान गर्दैछन् ।

साफ च्याम्पियनसिपको तयारीका लागि नेपाली टिम कतार जान लागेका हुन् । नेपाली टिम बिहान ११:१५ बजे कतार प्रस्थान गर्ने तालिका रहेको छ ।

कतार जाने नेपाली टोलीलाई अखिल नेपाल फुटबल संघ (एन्फा) ले बिहीबार नै बिदाइ गरेको थियो ।

मुख्य प्रशिक्षक अब्दुल्लाह अलमुताइरीको नेतृत्वमा नेपाली टिमले कतारमा प्रशिक्षण गर्ने छन् ।

नेपाली टिमले कतारमा १५ दिन तयारी गर्नेछ । नेपाली टिम कतारबाटै माल्दिभ्स जाने छन् ।

माल्दिभ्समा आयोजना हुने साफ च्याम्पियनसिप अक्टोबर १ देखि १६ (असोज १५ देखि ३०) गतेसम्म आयोजना हुनेछ ।

नेपालले आयोजक माल्दिभ्ससँग खेल्दै प्रतियोगिताको सुरुवात गर्नेछ ।

नेपाल र माल्दिभ्सबीचको खेल अक्टोबर १ (असोज १५) मा मालेस्थित राष्ट्रिय फुटबल स्टेडियममा हुनेछ ।

नेपालले दोस्रो खेलमा श्रीलंकासँग अक्टोबर ४ (असोज १८) गते खेल्नेछ ।

नेपालले तेस्रो खेलमा भारतसँग अक्टोबर १० (असोज २४) र लिग चरणको अन्तिम खेलमा बंगलादेशसँग अक्टोबर १३ (असोज २७) मा खेल्नेछ ।

पाँच राष्ट्र सहभागी प्रतियोगिताको लिग चरणको खेलपछि शीर्ष दुई टोलीले उपाधिका लागि अक्टोबर १६  (असोज ३०) मा प्रतिस्पर्धा गर्ने छन् ।