काठमाडौं । अखिल नेपाल फुटबल संघ (एन्फा)का केन्द्रिय सदस्य किरण राई प्रवक्ताकाे जिम्मेवारीबाट अलग हुने तयारीबाट पछि हटेका छन् ।
राष्ट्रिय फुटबल टिमका मुख्य प्रशिक्षक अब्दुल्लाहा अलमुताइरीको राजीनामा प्रकरणमा असन्तुष्ट रहेका राईले प्रवक्ताको जिम्मेवारीबाट पछि हट्ने तयारी गरेका थिए ।
सोही अनुसार एन्फाले आईतबार दिउँसो १ बजे पत्रकार सम्मेलनको सुचना जारी गरेको थियो । तर सवाँ घण्टा अघि पुन एक सुचना जारी गर्दै एन्फाले प्रवक्ता राईको कार्यक्रम स्थगित भएको जानकारी गराएको छ ।
विदेशी प्रशिक्षकले एन्फाका वरिष्ठ उपाध्यक्षमाथि सामाजिक सञ्जालमा आरोप लगाउदै राजीनामाको घोषणा गरेपछि प्रवक्ता राई पनि असन्तुष्ट छन् । तर सार्वजनीक रुपमा उनले प्रवक्ताको हैसियतमा संस्थागत धारणा राख्दै आएका छन् ।
शनिबार रातिमात्र उनले फेसबुकमा स्टाटस लेख्दै पद छाड्ने संकेत गरेका थिए । उनले सामाजिक सञ्जालमा आईतबार दिउसो बाँकी कुरा उल्लेख गर्ने बाचा गरेका थिए ।
शनिबार मात्र उनले आफु निकट जिल्ला र सहकर्मीसंग प्रवक्ताको जिम्मेवारीबाट राजीनामा दिने बताएका थिए । तर निर्धारित कार्यक्रमको केही घण्टा अघिमात्र उनी राजीनामा दिने निर्णयबाट पछि हटेका हुन् ।
‘एन्फाको समग्र कार्यक्रमको विषयमा पत्रकार सम्मेलन गरौं भन्ने थियो । तयारी पुरा भएन । राष्ट्रिय लिगको समेत तयारी भईरहेको छ । तयारी पुरा भएपछि पुन पत्रकार सम्मेलन हुन्छ ।’ प्रवक्ता राईले खेलपाटीसंग भने यस्तो धारणा राखे ।
मुख्य प्रशिक्षकको पछिल्ला गतिविधिबाट प्रवक्ता राई रुष्ट छन् । मुख्य प्रशिक्षकको राजीनामाको विषयमा छानविन गर्न एन्फाले युवा तथा खेलकुद मन्त्रालयलाई अनुरोध गरेको छ ।
छानविन नसकिने बेलासम्म अलमुताइरी प्रशिक्षणमा सहभागी नगराउने सहमती बनेको थियो । तर शनिबार मैत्रीपूर्ण खेलमा सहभागी हुन अलमुताइरी मैदानमा देखिएका थिए ।
अलमुताइरी मैदानमा खेलाडीसंग देखिएपछि राईले थप असन्तुष्ट ब्यक्त गरेका थिए । प्रशिक्षकको गतिविधिबाट रुष्ट राईले प्रवक्ताको जिम्मेवारीबाट अलग हुने तयारी गरेका थिए ।
राजीनामाको तयारी गरेपछि एन्फा अध्यक्ष शेर्पाले आईतबार बिहान प्रवक्तासंग 'लन्च मिटिङ' गरेका थिए । अध्यक्षसंगको भेटपछि प्रवक्ता राई राजीनामा दिने निर्णयबाट पछि हटेका हुन् ।
एन्फाले समेत आईतबार दिउँसको कार्यक्रम स्थगित भएको भन्दै सुचना जारी गरेको छ ।
उदयपुर जिल्लाबाट प्रतिनिधि बनेर आएका राईले अध्यक्ष शेर्पा प्यानलबाट केन्द्रिय सदस्यमा निर्वाचित भएका थिए । अध्यक्ष शेर्पाले राईलाई प्रवक्ताको जिम्मेवारी पनि दिए ।
एन्फाको राजनीतिमा प्रवक्ता राई वरिष्ठ उपाध्यक्ष पंकज नेम्वाङ्ग र शेर्पाबीच समदुरीमा राखेर काम गर्दै आएका छन् । तर फुटबल राजनीतिमा शेर्पा र वरिष्ठ उपाध्यक्षबीचको अन्तरसंघर्ष उत्कर्षमा पुगेपछि ‘कित्ता क्लियर’ गर्नुपर्ने दबाब राईमाथि छ ।
-1732590134.webp)
