टोकियो ओलम्पिक : पदकमा चीनको शीर्षता कायम  

एजेन्सी । विश्व खेलकुदको कुम्भमेला ३२ औं गृष्मकालीन ओलम्पिक खेलकुद 'टोकियो ओलम्पिक' जापानमा जारी छ ।

राजधानी टोकियोमा जारि ओलम्पिक अन्तर्गत शनिबार अपरान्हसम्म कुल १ सय ४१ स्वर्ण पदकको छिनोफानो भएको छ । जसमा रसियन ओलम्पिक टिमसहित कुल ४४ राष्ट्रले स्वर्ण पदक जितेका छन् ।

ओलम्पिकको आठौं दिनको खेल जारी रहदा पदक तालिकामा चीन शीर्ष स्थानमा यथावत रहेको छ । जापान र अमेरिकालाई पछि पार्दै चीन पदक तालिकाको शीर्ष स्थानमा रहेको हो ।

चीनले २० स्वर्ण पदकसहित कुल ४३ पदक जितेको छ । दोस्रो स्थानको जापानले १७ स्वर्ण पदकसहित कुल २८ पदक जितेको छ ।

यस्तै तेस्रो स्थानको अमेरिकाले १६ स्वर्णसहित कुल ४५ पदक जितेको छ ।

रसियन ओलम्पिक टिम १० स्वर्णसहित कुल ३४ पदक जितेर चौंथो स्थानमा रहदा अष्ट्रेलिया १० स्वर्णसहित कुल २६ पदक जितेर पाँचौं स्थानमा रहेको छ ।

यस्तै ग्रेट ब्रिटेनले ८ स्वर्ण जित्दा दक्षिण कोरियाले ५ स्वर्ण जितेको छ । नेदरल्यान्ड्स, क्रोएसिया, चेक रिपब्लिक, जर्मनी, क्यानडा, न्युजिल्याण्ड र फ्रान्सले ३/३ स्वर्ण पदक हात पारेका छन् । २ स्वर्ण जित्नेमा इटाली,  हंगेरी, कोसोभो  र स्लोभानिया रहेका छन् ।

त्यस्तै १ स्वर्ण जित्ने राष्ट्रको संख्या २६ पुगेको छ।

टोकियो ओलम्पिकमा नेपालको प्रतिस्पर्धा भने शुक्रबारबाट सकिएको छ । नेपालका पाँच खेलाडीले टोकियो ओलम्पिकमा प्रतिस्पर्धा गरेका थिए ।