अन्तर्राष्ट्रिय जुडो तालिममा बाँकेका २ खेलाडी

नेपालगन्ज । अन्तर्राष्ट्रिय जुडो महासंघको आयोजनामा स्विट्जरल्यान्डमा  आयोजना हुने तालिममा बाँकेका दुई खेलाडी पर्न सफल भएका छन् ।

खजुरा गाउँपालिकामा रहेको मंगोलियन जुडो क्लबका आयुष सिंह साउद र  सम्झना थापा एक हप्ते तालिममा सहभागी हुने भएका हुन् ।

मंगोलियन जुडो क्लबका अध्यक्ष तथा प्रशिक्षक विजय गुरुङका अनुसार सन् २०२१ अगष्ट १ देखि ७ सम्म संचालन हुने तालिममा नेपालबाट बाँकेका दुई जना मात्र खेलाडी छनौट भएका हुन् ।

'उक्त तालिममा विस्वभरका जुडो खेलाडीहरुको सहभागिता हुन्छ । नेपालबाट भने बाँके जिल्लाका दुईजना खेलाडी मात्र पर्न सफल भएका छन् । नेपाल अधिराज्यबाट राम्रा र सफल खेलाडीहरु छनोट गर्दा बाँके मंगोलियन जुडो क्लबका खेलाडी पर्न सफल भएका हुन्,’ प्रशिक्षक गुरुङले भने ।

तालिमका लागि उनीहरु बिहीबार त्यसतर्फ जाने छन् । उनीहरुलाई प्रशिक्षकले गुरुङले बुधबार विदाइ गरेका छन् ।

टोकियो ओलम्पिकमा पनि मंगोलियन जुडो क्लबकै सोनिया भट्ट नेपालको प्रतिनिधि गर्दै जापान गएकी छिन् ।