कुवेतको मौषममा खेल्न कठिन छ - प्रशिक्षक अलमुताईरी

काठमाडौं । सन् २०२२ को फिफा विश्वकप र सन् २०२३ को एसिया कपको लागि दोस्रो चरणको छनोट अन्तर्गत नेपालले भोलि (बिहीबार) चाईनिज ताईपेविरुद्ध खेल्दैछ ।

अरेबियन मुलुक कुवेतको राजधानी कुवेत सिटीमा नेपालले ताईपेसँग प्रतिस्पर्धा गर्ने छन् । नेपाल र ताइपेबीचको खेल राति ९:४५ बजे सुरु हुनेछ ।

ताइपेविरुद्ध मैदान उत्रदा नेपाल जित निकाल्ने लक्ष्यमा हुनेछ । तर, ४५ डिग्री सेल्सियस माथिको कुवेतको गर्मी मौषमले नेपाली टोलीलाई सताएको छ ।

ताइपेसँगको खेल अघि नेपाली राष्ट्रिय फुटबल टिमका मुख्य प्रशिक्षक अब्दुल्लाह अलमुताईरीले कुवेतको मौषममा खेल्न कठिन हुने बताए ।

'कुवेतको मौषममा खेल्न सहज छैन । दुबै टिमका लागि कठिन हुनेछ,' प्रि-म्याच कन्फरेन्समा प्रशिक्षक अलमुताईरीले भने ।

प्रशिक्षक अलमुताईरीले ताइपेविरुद्ध जित निकाल्दै एसिया कपमा छनोट हुने सम्भावना जीवित राख्ने लक्ष्य लिएको समेत बताए ।

'हामी छनोटको चौंथो स्थानमा रहेर एसियन कपमा छनोट हुने मौका कायम राख्न चाहन्छौं । त्यसैले हामीले भोलिको खेल जित्न चाहन्छौ,' प्रशिक्षक अलमुताईरीले भने, 'हामीले धेरै मैत्रीपूर्ण खेल पाएनौं । हामीसँग युवा टिम छ तर प्रतिभावान टिम र खेलाडी छन् । उनीहरुलाई हामीले जोड दिनुपर्छ ।'

नेपालले विश्वकप छनोटको तेस्रो चरणमा पुग्ने मौका गुमाईसकेको छ । तर, नेपाललाई बाँकी खेलमा जित निकाल्दै एसिया छनोटको तेस्रो चरणमा स्थान बनाउने सुनौलो अवसर रहेको छ ।

समूह 'बी' मा नेपाल ५ खेलबाट १ जित सहित ४ हार ब्यहोर्दै चौथो स्थानमा रहँदा ताईपे ५ खेलबाट अंक विहीन हुदै तालिकाको पुछारमा छ ।

४ खेलबाट शत प्रतिशत १२ अंक जोडेको अष्ट्रेलिया पहिलो स्थानमा छ । ५ खेलबाट समान १० अंक बनाएका कुवेत र जोर्डन गोल अन्तरका आधारमा क्रमशः दोस्रो र तेस्रो स्थानमा छन् ।

चाईनिज ताईपेविरुद्धको हेड टु हेडमा भने नेपाल बलियो देखिएको छ । नेपाल र ताइपे अहिलेसम्म दुई पटक भिडेका छन् ।

पहिलो भेट बराबरमा सकिएको थियो भने दोस्रो भेटमा नेपालले २–० को बाजी मारेको थियो ।

ताइपेका प्रशिक्षक भोम का हुमले खेलमा मौषमको चुनौती सबैभन्दा बढी भएको बताए ।

'हामीलाई यहाँको मौषम अनुकुल हुन कठिन भईरहेको छ । र, हाम्रो लागि मुख्य चुनौती मौषम हो,' उनले भने ।

प्रशिक्षक भोमले टिमको मुख्य खेलाडीहरु कोरोनाको कारणले टिममा सामेल नभएको तर नयाँ खेलाडीले आफुलाई प्रमाणित गर्ने समेत बताए ।