कोरोनाको चपेटामा ओलम्पिक छनोट

काठमाडौं । ओलम्पिक छनोटको तयारीमा रहेको नेपालको कराँते टोलीले अप्रिल ३० देखि मे ३ सम्म पोर्चुगलमा हुने कराँते प्रिमियर लिगमा सहभागिता जनाउन बन्चित बन्यो ।

विश्व वरियतामा सयौं स्थानसम्म रहेका खेलाडीले आफ्नो वरीयता सुधारका लागि खेल्ने प्रतियोगिता नेपाली खेलाडीले अन्तिम समयमा आएर गुमाउनु पर्यो ।

आफ्नै खर्चमा नाम दर्ता गरेका कराँते खेलाडीलाई बढ्दो कोरोना भाइरस संक्रमणको कारण देखाउँदै संघले पोर्चुगल यात्रा स्थगित गरेको थियो । यसले लाखौ खर्च गरेर ओलम्पिकको तयारी गरिरहेका खेलाडीलाई निराश गर्यो नै, यसले ओलम्पिक छनोटको सम्भावना समेत न्युन गरेको प्रशिक्षक दीपक श्रेष्ठ बताउँछन् ।

‘प्रतियोगितामा जान पाएको भए खेलाडीको वरियता बढ्ने थियो । खेलाडीले प्रतियोगितामा उत्कृष्ट प्रदर्शन गरेको भए ओलम्पिक छनोटका लागि ढोका खुल्न सक्थ्यो ।’ प्रशिक्षक श्रेष्ठले खेलपाटीसंग भने, ‘सहभागिता जनाएको भए केही न केही हुन्थ्यो । तर सहभागितानै जनाउन पाएनौं । यसले गर्दा ओलम्पिकमा नेपालको वाइल्ड कार्ड सम्भावन पनि धेरै न्युन रहेको छ ।’

जुनमा फ्रान्समा ओलम्पिक छनोट प्रतियोगिता हुँदैछ । तर छनोट खेल खेल्न नेपाली खेलाडीको वरीयता नपुग्ने प्रशिक्षक श्रेष्ठ बताउँछन् ।

उनले वरीयताको शीर्ष २० भित्र परेकाले मात्र छनोट खेल्ने अवसर पाउने भएकाले छनोट खेल्न गाह्रो भएको बताए ।

प्रशिक्षक श्रेष्ठका अनुसार नेपाली कराँते टोलीले ओलम्पिक छनोट खेल्ने सम्भावना न्युन रहेकाले अब वाइल्ड कार्डकै भरमा रहनुपर्ने उल्लेख गरे ।

कराँतेमात्र हैन ओलम्पिक छनोटको तयारी गरिरहेका अधिकांश खेलाडीहरु कोरोनाको चपेटमा परेका छन् । नेपाल सहित विश्व अधिकांश देशमा भएको लकडाउन, हवाई उडानको प्रतिबन्ध र क्वारेन्टिनको समयले खेलाडीको छनोट प्रतियोगिता प्रभावित देखिएको छ ।

यता, बक्सिङ खेलाडीले आफ्नै खर्चमा एसियन च्याम्पियन्सीप छनोटको आयोजना गर्दै च्याम्पियनसिप खेल्ने सपना बोकेका थिए । लतिलपुरमा चैत २९ देखि ३१ सम्म आयोजना भएको प्रतियोगिताबाट ७ खेलाडी छनोट हुँदै एसियन च्याम्पियनसिपन खेल्ने सपना बोकेका थिए । तर उनीहरुको सपनामा संघको विज्ञप्तिले पानी हाल्ने काम गर्यो ।

मे २२ देखि ३१ सम्म दुबईमा आयोजना हुने बक्सिङ च्याम्पियनसिपमा नेपाली खेलाडीले सहभागिता जनाउने तय भएपनि अन्तिममा आएर बक्सिङ संघले कोरोना महामारीको अवस्था र अन्तर्राष्ट्रिय उडान बन्दको कारण देखाउँदै प्रतियोगितामा सहभागिता जनाउन असम्भव भएको विज्ञप्तिमार्फत जनाएको थियो ।

यता, नेपाली तेक्वान्दो खेलाडीले भने ओलम्पिक छनोट प्रतियोगितानै गुमाई सकेका छन् । जोर्डनमा मे २१ देखि २२ सम्म आयोजना भएको ओलम्पिक छटनोटमा नेपाली खेलाडीले अन्तिम अवस्थामा आएर सहभागिता जनाउन पाएनन् ।

तेक्वान्दोका वीरबहादुर महरा, भूपेन श्रेष्ठ र महिलातर्फ निमा गुरुङ छनोट प्रतियोगिता खेल्न तयार थिए । तर बढ्दो कोरोना संक्रमणका कारण जोर्डन सरकारले दुई साताअघि मात्र भारत र नेपालबाट जोर्डन आउनेका लागि कम्तीमा दुई साता क्वारेन्टाइनमा अनिवार्य बस्नु पर्ने नियम ल्यायो । नयाँ नियमपछि नेपाली खेलाडीले सहभागिता जनाउन पाएनन् ।

‘ओलम्पिक छनोटमा जाने भनेर तयारीमा थियौ । प्रशिक्षण पनि गरिरहेका थियौ । तर बीचमा बन्दाबन्दी भयो । तर पनि जानेनै भनिरहेका थियौं ।’ ओलम्पिक छनोटको तयारीमा रहेका भूपेन श्रेष्ठले भने, ‘प्रतियोगिताको केही दिन अगाडी मात्रै पुग्ने गरेर जाने तयारी गरिरहेका थियौ । तर दुई साता क्वारेन्टाइन बस्नु पर्ने भन्ने सुनियो । हाम्रो तयारी पुगेन र सहभागि हुन सकेनौ ।’

वीरबहादुरले ओलम्पिक छात्रवृत्ति पाएका छन् । तेक्वान्दोमा नेपालले वाइल्ड कार्ड पाएको खण्डमा वीरबहादुरले नेपालको प्रतिनिधित्व गर्ने छन् । तर भूपेन र निमाको यस वर्षको ओलम्पिक यात्रा सकिएको छ ।

तेक्वान्दोको विश्व वरीयताको तेस्रो नम्बरमा रहेका भुपेन नेपाली तेक्वान्दोको पछिल्लो पुस्ताका निकै सम्भावना बोकेका खेलाडी हुन् । उच्च लयमा रहेका भूपेनले घरेलु भुमिमा आयोजना भएको १३ औं सागमा स्वर्ण पदक जितेका थिए । ओलम्पिकै तयारीमा रहेकी निमाले १३ औं सागमा रजत पदक जितेकी थिइन् ।

नेपाल तेक्वान्दो संघका अध्यक्ष प्रकाश शम्सेर राणाले छोटो समयमा दुई साताको क्वारेन्टाइन बस्नु पर्ने सुचना आएकाले तयारी नपुग्दा छनोटमा सहभागिता हुन नसकेको बताए ।

‘प्रतियोगिताको १७ दिन अगाडी मात्रै दुई साता क्वारेन्टाइन बस्नु पर्ने भन्ने सुचना आयो । छोटो समयमा सूचना आएकाले तयारी गर्न सकेनौ ।’ राणाले भने, ‘देश बन्दाबन्दीमा थियो । तीन दिनमा एयरवेजको टिकटदेखि जोर्डनमा बस्ने खाने व्यवस्था मिलाउनु पर्ने थियो । जुन सम्भब भएन ।’

उनले थपे, ‘जोर्डन सरकारबाटै भारत र नेपालको नामै तोकेर क्वारेन्टाइन अवधि बढाएको सुचना प्राप्त गर्नु अघि प्रतियोगिता भन्दा दुई दिन अगाडि प्रस्थान गर्न प्लेनको टिकटसमेत काटिसकेका थियौं । खर्च विवरणका लागि राखेप र सरकारसँग पनि छलफल गरिसकेका थियौ । नेपाल ओलम्पिक कमिटी र जोर्डन तेक्वान्दो संघलाई पनि पहल गरिदिन पत्राचार गरेका थियौं । तर कोरोना महामारीका कारण सफल हुन सकेनौं ।’

संघका अध्यक्ष राणाले अब वाइल्ड कार्डका लागि जोड दिने बताए । उनले वाइल्ड कार्डका लागि ओलम्पिक कमिटिसँग पहल गरिरहेको जानकारी दिए ।
छनोट प्रतियोगिता नसकिएकाले कसलाई वाइल्ड कार्ड दिने भन्ने अहिलेनै टुङ्गो नलागेको उनले जानकारी दिए । छनोट प्रतियोगितापछि मात्रै वाइल्ड कार्डको टुङ्गो छ ।

नेपालबाट टोकियो ओलम्पिकमा पौडीका गौरिका सिंह र एलेक्स शाह तथा एथलेटिक्सका गोपीचन्द्र पार्कीको मात्र सहभागिता मात्रै अहिलेसम्म निश्चित भएको छ । पौडी र एथलेटिक्स दुवै खेलको अनिवार्य सहभागिता रहेकाले नेपालबाट दुई खेलका खेलाडीको टुङ्गो लागेको छ । त्यसबाहेक अन्य खेलका खेलाडी वाइल्ड कार्डको पर्खाइमा छन् ।

जुलाई २३ देखि अगस्ट ८ सम्म जापानमा हुने ग्रीष्मकालीन ओलम्पिकका लागि हालसम्म सुटिङ, बक्सिङ, जुडो र भारोत्तोलनले मात्रा ओलाम्पिक छनोट खेल खेलेका छन् ।

आर्चरीले जुन १८ मा फ्रान्सको पेरिसमा ओलम्पिक छनोट खेल्ने तय छ । बन्दाबन्दीको अवस्था यथावत रहेमा सहभागिता जनाउने सम्भावना न्युन रहने नेपाल आर्चरी संघका अध्यक्ष दीपक राज गुरुङ बताउछन् ।

उनले अन्तर्राष्ट्रिय उडान बन्द भएका कारण पर्ख र हेरको स्थितीमा आफुहरु रहेको बताए ।

‘सहभागी हुुने प्रयास गरिरहेका छौ । ओलम्पिक कमिटी र राखेपसँग पनि छलफल गरिरहेका छौं । तर अवस्था यस्तै रहे भन्न सकिने अवस्था छैन । फ्रान्समा एक साता क्वारेन्टाइनमा बस्नु पर्ने भनेको छ । तर दोस्रो लहरको कोरोनाका कारण अन्तिम अवस्थासम्म क्वारेन्टाइन प्रोटोकल परिवर्तन पनि हुन सक्छ ।’ संघका अध्यक्ष गुरुङले भने, ‘मेको अन्तिमसम्म हेर्छौ, त्यसपछि मात्रै केही निर्णय गर्न सक्छौ ।’

आर्चरीका ज्ञानु अवाले र तिलक पुन मगर ओलम्पिक छनोटको तयारीमा छन् । यतिबेला आर्चरीले पोखरामा ओलम्पिक छनोटको तयारी गरिरहेको छ ।

ओलम्पिकमा वाइल्ड कार्डमार्फत विश्व भरबाट सुटिङ र जुडोका सर्वाधिक १२ पुरुष र १२ महिला खेलाडीले ओलम्पिक खेल्न पाउनेछन् । त्यस्तै जुडोमा २० जनाको कोटा छुट्याइएको छ भने भारोत्तोलनमा ४ महिला र ४ पुरुष तथा बक्सिङमा ५ पुरुष ३ महिला खेलाडीले वाइल्ड कार्डबाट सहभागिता जनाउने छन् ।

तेक्वान्दो, आर्चरी र पहिलोपल्ट ओलम्पिकमा समावेश हुन लागेको कराँतेमा २ पुरुष र २ महिला खेलाडीका लागि लागि कोटा छुट्याएको छ ।