म्यारोडोनाको निधन - हेरचाहको कमी र लापरबाही

एजेन्सी । अर्जेन्टिनाका महान फुटबलर डिएगो म्यारोडोनाको निधनको मेडिकल रिपोर्ट सार्वजनिक भएको छ ।

चिकित्सकहरुको एक विशेषज्ञ टोलीले रिपोर्ट सार्वजनिक गर्दै म्यारोडोनाको निधन हेरचाहको कमी र लापरबाही मुख्य कारण भएको जनाएका छन् ।

म्यारोडोनाको गत नोभेम्बरमा ६० वर्षको उमेरमा हृदयघातको कारण निधन भएको थियो ।

म्यारोडोनाको निधनपछि चिकित्सकको एक टोलीले अनुसन्धान थालेको थियो ।

विशेषज्ञ टोलीले आफ्नै लापरबाहीको कारण म्यारोडोनाले ज्यान गुमाउनु परेको निष्कर्ष निकालेको हो ।

म्यारोडोना कोकिन र रक्सीको लतमा रहेका थिए ।

निधन अघि म्यारोडोनाले मष्तिस्कको शल्यक्रिया गरेका थिए । यस्तै उनको मदिरामाथिको निर्भरताको पनि उपचार गरिँदै थियो ।

अर्जेन्टिनाका पूर्व प्रशिक्षक समेत रहेका म्यारोडोना विश्व फुटबलका महान खेलाडी मानिन्छन् ।

म्यारोडोनाले अर्जेन्टिनालाई सन् १९८६ मा विश्वकपको उपाधि दिलाएका थिए ।

मेक्सिकोमा भएको विश्वकपको फाइनलमा वेस्ट जर्मनीलाई ३-२ ले हराएको अर्जेन्टिनाले विश्वकप उपाधि जितेको थियो ।

त्यस समय म्यारोडोना टिमका कप्तान रहेका थिए ।

त्यहिँ विश्वकपको क्वाटरफाइनलमा इंग्ल्यान्डविरुद्ध २-१ को जित निकाल्दा म्यारोडोना नायक बनेका थिए । उनले दुबै गोल गरेका थिए ।

इंग्ल्यान्डविरुद्ध उनले गरेको पहिलो गोललाई 'ह्यान्ड अफ गड' भन्ने गरिन्छ । किनकी उनले हातले गोल गरेका थिए । तर, रेफ्रीके नदेख्दा उक्त गोललाई मान्यता दिइएको थियो ।

अर्जेन्टिनाका लागि म्यारोडोनाले १९७७ देखि १९९४ सम्म खेलेका थिए ।

उनले अर्जेन्टिनाका लागि ९१ खेलमा ३४ गोल गरेका थिए ।

सन् २००८ देखि २०१० को विश्वकपसम्म म्यारोडोना अर्जेन्टिनाको मुख्य प्रशिक्षक रहेका थिए ।

म्यारोडोनाले युरोपियन क्लब बार्सिलोना, नापोली र सेभिया जस्ता युरोपका ठुला क्लबबाट खेलेका थिए ।

अर्जेन्टिनोस जुनियर्सबाट व्यवसायिक फुटबलको सुरुवात गरेका उनले १९८१ देखि ८२ सम्म बोका जुनियर्सबाट खेलेका थिए ।

त्यसपछि उनी बार्सिलोना आएका थिए । उनले सन् २०८२ देखि ८४ सम्म बार्सिलोनाका लागि ३६ खेलमा २२ गोल गरेका थिए ।

यस्तै १९८४ देखि १९९१ सम्म इटालियन क्लब नापोलीबाट उनले खेलेका थिए । नापोलीका लागि १८८ खेलमा ८१ गोल गरेका थिए ।

नापोलीबाट सेभिया गएका उनले त्यहाँ एक सिजन बिताएका थिए । सेभियामा उनले २६ खेलमा ५ गोल गरेका थिए ।

उनले क्लब फुटबलको अन्त्य साम १९९७ मा बोका जुनियर्सबाट गरेका थिए ।

तर, म्यारोडोना करिअरको अन्त्यतिर भने लागूऔषधको दुर्व्यसनमा फसेका थिए । लागूऔषध प्रयोगकै कारण उनी पटक पटक जेल समेत परे । सन् १९९१ मा उनले १५ महिनाको प्रतिबन्ध समेत भोगेका थिए ।