नतिजाले हतोत्साहित हुदैनौं - प्रशिक्षक हुमागाई

काठमाडौं । नेपाल सुपर लिग (एनएसएल) फुटबलको फ्रेन्चाईज टिम ललितपुर सिटी एफसीका मुख्य प्रशिक्षक प्रदिप हुमागाईले दुई खेलको खराब नतिजाले हतोत्साहित नहुने बताएका छन् ।

त्रिपुरेश्वरस्थित दशरथ रंगशालामा सोमबार एफसी चितवनसँग १-१ गोलको बराबरीमा रोकिएपछि प्रशिक्षक हुमागाईले खराब नतिजा आएपनि अबको बाँकी खेलमा सुधार गर्ने बताए ।

'दुई खेल सकिदैमा हतोत्साहित हुनुपर्ने छैन। अरु खेल पनि बाँकी छन् । अब राम्रो गर्छौ,' उनले भने ।

खेलको ४९ औं मिनेटमा कमल श्रेष्ठले गोल गर्दै ललितपुरलाई अग्रता दिलाए । मैदानको दायाँ भागको २५ यार्डबाट कमलले टप कर्नरमा गोल गरेका थिए ।

तर, खेलको इन्जुरी समयमा अमित तामाङले पेनाल्टीमा गोल गर्दै चितवनलाई बराबरीमा फर्काएका थिए ।

'राम्रो खेल्न खोजेको हो । खेल ड्र भयो । खेलाडी पोजेटिभ छन्,' उनले भने, 'खेलाडीहरुको विश्वास लिएर अबको खेलमा अगाडी बढ्ने छौँ।'

खेलमा ललितपुरले पेनाल्टीबाट गोल गर्ने मौका गुमाएको थियो । २१ औं मिनेटमा ललितपुरका कप्तान अन्जन विष्टले पेनाल्टीमा गोल गर्न सकेनन् ।

'खेलमा ठूलो खेलाडी भने हुदैन । अन्जनको ठाउमा अर्को भएको भए गोल हुने थियो कि थिएन । उ राम्रो खेलाडी हो । तर आज पेनाल्टीमा गोल हुन सकेन । विपक्षी गोलकिपरले राम्रो खेलेको हो,' उनले थपे ।

चितवनका प्रशिक्षक मेघराज केसीले टिमले सोचेजस्तो खेल्न नसकेको बताए ।

'टोलीबाट जति आशा गरेका थियौं त्यति पाएनौं । हामीले आवश्यकता अनुसार खेललाई प्रयोग गरेका हौँ । विशाल सुनार पनि राम्रो खेलाडी हो । उसले आज आफुलाई प्रमाणित गरेको छ,' केसीले भने ।

यस्तै केसीले प्रतियोगिता खेल्ने सबै टिम अब्बल टिम रहेको बताए ।

'सबै टिम उस्तै छ । तर, मैले आफुलाई तल राखेर अरु सबै टोलीलाई माथी राखेको छु । अहिले नै यो टिम राम्रो भन्नु हतार होला । एकै खेलले टिमको मुल्यांकन गर्न सकिँदैन,' उनले थपे ।