कृष्ण र सुदिप सेमिफाइनलमा

काठमाडौं । ६४ औँ सहकारी दिवसको उपलक्ष्यमा आयोजित गणेशमान सिंह स्मृति आठौं सहकारी कप फिडे रेटिङ बुद्धिचाल प्रतियोगिताको चौथो दिन छैठौं र सातौं चरणका खेलहरु सम्पन्न भएको छ ।

छैठौं र सातौं चरणका खेलहरु सकिदा सुन्दर साकोस हेटौंडाका कृष्ण थापा, दोलखाका मिलन लामा, गजुमूखी चेस क्लबका राजन सुवेदी र नोभा साकोस ललितपुरका सुदिप तामाङ समान ६ अंकका साथ संयुक्त शीर्ष स्थानमा रहदै नकआउट चरणमा प्रवेश गरेका छन् ।

ललितपुरको ताम्रकार भवनमा जारी प्रतियोगितामा कृष्णले छैटौं चरणमा स्वागतम साकोस ललितपुरका युवराज पौडेललाई माथ गरे भने सातौंमा दोलखा चेसका मिलन लामासहित बराबरी खेले ।

मिलनले छैटौंमा गजुरकूखी चेस क्लबका फिडेमास्टर रिजेन्द्र राजभण्डारीलाई हराएका थिए । त्यस्तै राजनले छैटौंमा गजुरमूखीका प्रकाशचन्द्र नेपाल र सातौँमा दोलखाका सुमित पन्तलाई निराश पारेका थिए । यसैगरी सुदिपले छैटौैंमा माउण्ट एभरेष्ट चेस एण्ड सोसियल क्लबका क्षितिज भण्डारी र सातौँमा गोल्डेनगेट कलेजका निकेन कुसाथलाई हराएका थिए ।

ललितपुर स्पोर्टस क्लब र ताम्रकार समाजद्वारा संयुक्त रुपमा आयोजित प्रतियोगिताका विजेतालाई यहाहा मोटरसाइकल, उपविजेताले नगद रु ६० हजार, तृतीयले रु ३० हजार र चौथोले रु. पच्चीस हजार हात पार्नेछन् । भने कूल नगद पुरस्कार ५ लाख ६१ हजार ४ सय रुपैयाँ रहेको छ ।

अब सेमिफाइनलमा कृष्ण थापाले सुदिप तामाङ र मिलन लामाले राजन सुवेदीको सामना गर्नेछन् ।