सुदूरपश्चिम स्पोर्टस अवार्ड : तीन विधाको मनोनयन सार्वजनिक

धनगढी । दोस्रो कैलाली अस्पताल सुदूरपश्चिम स्पोर्टस अवार्डका थप ३ विधाको मनोनयन सार्वजनिक गरिएको छ ।

आयोजक नेपाल खेलकुद पत्रकार मञ्च कैलालीले बिहीबार अवार्डमा प्रदान गरिने ९ मध्ये थप ३ विधाको मनोनयन सार्वजनिक गरेको हो ।

आयोजकले यस अघिनै चार विधाको मनोनयन सार्वजनिक गरिसकेको छ ।

बिहीबार नवजीवन हस्पिटल वर्ष पुरुष खेलाडी, नोभा हस्पिटल वर्ष महिला खेलाडी र दिनेश सोप वर्ष प्रशिक्षक विधाको मनोनयन सार्वजनिक गरिएको हो ।

कैलाली हस्पिटल दोस्रो सुदूरपश्चिम स्पोर्टस अवार्डको बर्ष पुरुष विधा प्रायोजक नवजीवन हस्पिटलका सञ्चालक योगेन्द्र ओझा, नोभा हस्पिटलकी प्रशासकीय अधिकृत सुमन भट्ट र दिनेश सोपका ब्रान्ड निर्देशक आदित्य हमालले मनोनयन सार्वजनिक गरे ।

वर्ष पुरुष खेलाडीको मनोनयनमा एथलेटिक्सका गोपीचन्द्र पार्की, दुवाथोलनका हिमाल टमटा र तेक्वान्दोका वीर बहादुर महरा परेका छन् । तीनै जनाले १३ औं दक्षिण एसियाली खेलकुदमा स्वर्ण पदक जितेका छन् ।

वर्ष महिला खेलाडीको मनोनयनमा पौडीकी गौरिका सिंह, तेक्वान्दोकी आयशा शाक्य र कुस्तीकी संगिता धामी परेकी छिन् । १३ औं दक्षिण एसियाली खेलकुदमा गौरिकाले चार स्वर्ण सहित ९ पदक जितेकी थिईन् भने आयशाले तेक्वान्दोमा दोहोरो स्वर्ण जितेकी थिईन् । संगिताले सागको ईतिहासमा पहिलो पटक कुस्तीमा स्वर्ण जिताएकी थिईन् ।

वर्ष प्रशिक्षकको मनोनयनमा भलिबलका जगदीश भट्ट, कुस्तीका राजेन्द्र चन्द र कबड्डीका तारासिंह भाट परेका छन् । जगदिशले १३ औं दक्षिण एसियाली खेलकुदमा महिला भलिबलमा रजत पदक जिताएका थिए भने सेन्ट्रल जोन भलिबलमा स्वर्ण जिताएका थिए । राजेन्द्रले १३ औं दक्षिण एसियाली खेलकुदको ईतिहासमा पहिलो पटक कुस्तीमा स्वर्ण पदक सहित ७ पदक जिताएका थिए ।
तारासिंह भाटले पनि सागमा महिला कबड्डीमा नेपाललाई ऐतिहासिक रजत पदक जिताएका थिए । ईन्डो नेपाल आमन्त्रण कबड्डी प्रतियोगितामा पुरुष टीमलाई रजत जिताएका थिए ।

सात विधाको मनोनयन सार्वजनिक भएपनि दुई विधाको घोषणा भने अवार्ड कार्यक्रममा नै हुने अवार्डका संयोजक प्रदीप पाठकले जानकारी दिए । उनका अनुसार न्यू सिटी पोलीक्लिनिक स्पेशल अवार्ड र सारथी अस्पताल लाईफटाईम एचिभमेन्ट अवार्डको घोषणा चैत ६ गते कार्यक्रममै गरिनेछ ।

अवार्डमा वर्ष २०७६ मा गरेको प्रदर्शनका आधारमा उत्कृष्ट पुरुष खेलाडी, उत्कृष्ट महिला खेलाडी, उत्कृष्ट युवा खेलाडी, उत्कृष्ट प्रशिक्षक, उत्कृष्ट पारा खेलाडी र वर्षको उत्कृष्ट टिम तथा खेलकुदमा पु¥याएको विशेष योगदानको कदर स्वरुप स्पेसल अवार्ड, पूरा जीवन खेलकुदमा समर्पित गर्ने एक पाका खेलकर्मीलाई लाइफटाइम अचिभमेन्ट अवार्ड, समर्थकको मतका आधारमा दिइने पिपल्स च्वाईस अवार्ड गरी ९ विधामा खेलाडी तथा खेलकर्मीलाई पुरस्कृत गरिनेछ ।

अवार्डको उत्कृष्ट खेलाडी पुरुष र महिला, उत्कृष्ट प्रशिक्षक र पिपल्स च्वाइस अवार्ड गरी ४ विधाका विजेतालाई नगद ३० हजार सहित ट्रफी मेडल र प्रमाणपत्र, वर्ष युवा खेलाडी, स्पेसल अवार्ड, लाईफ टाईम एचिभमेन्ट अवार्डका विजेताहरूलाई नगद २५ हजार सहित ट्रफी मेडल र प्रमाण पत्र दिईनेछ । यस्तै सुदूरपश्चिम आईकन महिला र पुरुष विधाका विजेतालाई नगद २० हजार सहित ट्रफी मेडल र प्रमाणपत्रका साथै विभिन्न विधाका विजेतालाई गिफ्ट ह्याम्पर प्रदान गरिने आयोजकले जनाएको छ ।