युनाईटेड क्वाटरफाइनलमा

एजेन्सी । म्यानचेस्टर युनाईटेड एफए कप फुटबलको क्वाटरफाइनलमा प्रवेश गरेको छ ।

मंगलबार राति भएको खेलमा वेस्ट ह्याम युनाईटेडलाई अतिरिक्त समयमा १-० ले हराउँदै युनाईटेड अन्तिम आठमा पुगेको हो ।

घरेलु मैदानमा युनाईटेडलाई जित दिलाउन स्कट म्याकटोमिनले निर्णायक गोल गरे ।

खेलको निर्धारित समय गोलरहित बराबरीमा सकिएपछि खेल अतिरिक्त समयमा गएको थियो ।

अतिरिक्त समयमा युनाईटेडले बाजी मार्यो ।

खेलको ९७ औं मिनेटमा म्याकटोमिनले गोल गर्दै युनाईटेडलाई जित दिलाए ।

मार्कस राषफोर्डले उपलब्ध गराएको पासमा म्याकटोमिनले निर्णायक गोल गरेका हुन् ।

यससंगै युनाईटेड लगातार सातौं वर्ष एफए कपको क्वाटरफाइनलमा पुग्न सफल भएको छ ।

तर, युनाईटेडले सन् २०१६ पछि उपाधि जित्न सकेको छैन ।

एफए कप अन्तर्गत नै बर्नेमाउथले बर्नलीलाई २-० ले हराएर एफए कपको अन्तिम आठमा स्थान पक्का गरेको छ ।