प्रभातेश्वर भलिबलको क्वाटरफाइनल समीकरण पूरा

काठमाडौं । पहिलो संस्करणको प्रभातेश्वर पुरुष भलिबल कप प्रतियोगिताको क्वाटरफाइनल समीकरण पूरा भएको छ ।

थानकोटस्थित प्रभातेश्वर महादेवको प्राङ्गणमा बुधबार भएको समूह चरणका अन्तिम खेलहरुसँगै क्वाटरफाइनल पुग्ने अन्तिम ८ टोलीको टुंगो लागेको हो ।

समूह 'ए' बाट श्री शान्त सेकेण्डरी स्कुल पोखरा ९ अंकसहित विजेता बन्दा आरजे भलिबल ग्रुप ६ अंकसहित उपविजेता बन्दै अन्तिम आठमा पुग्ने सफल भयो ।

समूह 'बी' बाट फाइभ स्टार युथ क्लब ९ अंकसहित विजेता र ६ अंक जोडेको गितान्जली कलेज उपविजेता बन्दै नकआउट चरणमा पुग्न सफल भयो ।

यस्तै समूह 'सी' बाट एमभिटिसीको 'ए' टोली ९ अंकसहित विजेता र आयोजक प्रभातेश्वर स्पोर्ट्स क्लब ६ अंक सहित उपविजेता बन्यो ।

समूह 'डी' बाट ९ अंक जोडेको ढोरपाटन क्लब विजेता र ६ अंक जोडेको महांकाल भलिबल क्लब उपविजेता बनेर अन्तिम आठमा पुग्न सफल भएको छ ।

समूह चरण अन्तर्गत बुधबार भएको खेलमा श्री शान्त पोखराले पन्चकन्या गाउँपालीकालाई २-० को सोझो सेटमा पराजित गर्यो ।

फाइभ स्टारले गितान्जलीलाई २-१ को सेटमा पराजित गर्दा ढोरपाटनले महांकाललाई २-१ कै सेटमा पराजित गर्यो ।

यस्तै अन्तिम खेलमा भने आयोजक प्रभातेश्वर एमभिटिसी 'ए' सँग २-० को सोझो सेटमा पराजित भयो ।

प्रतियोगिताको विजेताले १ लाख, उपविजेताले ५० हजार र तेस्रो हुनेले २५ हजार रुपैयाँ प्राप्त गर्ने छन् ।