भलिबल प्रशिक्षण केन्द्रको नवनिर्मित तल्लाको उद्घाटन

काठमाडौं । ललितपुरस्थित जावलाखेल भलिबल प्रशिक्षण केन्द्रको थप गरिएको नयाँ तल्लाको उद्घाटन गरिएको छ ।

सोमबार ललितपुरका प्रदेश सांसद जीवन खड्काले प्रशिक्षण केन्द्रको कार्यालय भवनको रुपमा बनेको नयाँ तल्लाको उद्घाटन गरेका हुन् ।

संसदीय पूर्वाधार विकास कार्यक्रम अन्तर्गत विकास कोषबाट अनुदान सहयोगमा प्रशिक्षण केन्द्रको भवन निर्माण गरिएको हो ।

खड्काको सांसद विकास कोषको अनुदान रकमबाट भवनको तल्ला थप गरिएको प्रशिक्षण केन्द्रले जनाएको छ । उद्घाटनसंगै प्रशिक्षण केन्द्रको कार्यालय नयाँ तल्लाबाट सञ्चालनमा आएको छ ।

भवनको उद्घाटन गर्दै सांसद खड्काले लामो विरासत बोेकेको प्रशिक्षण केन्द्रको विकासका लागि सांसद विकास कोषको रकम सहयोग गरिएको बताए । उनले निर्माणाधिन अवस्थामा रहेको जावलाखेलको भलिबल कभर्ड हल देशकै उदाहरणिय बन्ने विश्वास ब्यक्त गरे ।

प्रशिक्षण केन्द्रका अध्यक्ष माधव खड्काले संस्थालाई थप व्यवस्थित बनाउँदै अघि बढ्न आवश्यक रहेको बताएका थिए । उनले प्रशिक्षण केन्द्रको भवन र कभर्डहल निर्माण गर्न प्रदेश सरकारले गरेको सहयोगका लागि धन्यवाद दिएका थिए ।

ललितपुरका प्रदेश सांसद खड्काले उपलब्ध गराएको २० लाख रुपैयाँमा ट्रेनिङ सेन्टरको कार्यालय तल्ला निर्माण गरिएको हो ।

प्रशिक्षण केन्द्रका महासचिव कुमार केसीले प्रदेश सरकारको २७ लाखको सहयोगमा कभर्डहलको दक्षिणतर्फको प्यारापिट निर्माण हुने प्रक्रियामा रहेको जानकारी दिए ।

बागमती प्रदेश सरकारकै सहयोगमा जावलाखेलमा भलिबलको एकमात्र कभर्डहल बन्ने क्रममा रहेको छ ।

आगामी बैशाखभित्र निर्माण सम्पन्न गर्ने लक्ष्य राखिएको कभर्डहललाई प्रदेश सरकारले २ करोड ४५ लाख रुपैयाँ प्रदान गरेको छ ।

नयाँ भवनकाे उद्घाटन कार्यक्रममा वडा नम्बर ४ का अध्यक्ष नारायण केसी र वडा नम्बर १३ का अध्यक्ष गणेश केसीको उपस्थिती रहेको थियो ।

यस्तै, राखेप बोर्ड सदस्य ईन्दिरा निरौला, भलिबल प्रशिक्षक कपिल किशोर श्रेष्ठ तथा प्रशिक्षण केन्द्रका सदस्यहरु निलम बज्राचार्य, अन्जु श्रेष्ठ र मनिदा शाही समेत कार्यक्रममा सहभागी थिए ।