'मन्देकाजी जिताउ अभियान'मा लगनखेल डोजोको सहयोग

काठमाडौं । कराँतेका मन्देकाजी श्रेष्ठलाई पिपल्स च्वाईस अवार्डमा जिताउन लगनखेल डोजोले आर्थिक सहयोग गरेको छ ।

घरेलु खेलकुदको सर्वाधिक प्रतिष्ठित अवार्ड कार्यक्रम पल्सर स्पोर्टस अवार्डको पिपल्स च्वाईस विधाको मनोनयनमा परेका मन्देकाजीलाई जिताउन लगनखेल डोजोले आर्थिक सहयोग गरेको हो ।

मन्देकाजी १३ औं दक्षिण एसियाली खेलकुद प्रतियोगिता (साग)का दोहोरो स्वर्ण विजेता खेलाडी हुन् ।

कराँतेबाट कीर्तिमान सफलता हात पारेका मन्देकाजीको लोकप्रियता र चर्चालाई आधार बनाएर आयोजक नेपाल खेलकुद पत्रकार मञ्च (एनएसजेएफ)ले उनलाई पिपल्स च्वाईस विधामा मनोनयन गरेको छ ।

आठौं तथा नवौं साग गेम्सका कराँतेका स्वर्ण विजेता खेलाडी दीपक श्रेष्ठको संयोजनमा मन्देकाजीलाई जिताउने अभियान सुरु भएको छ । श्रेष्ठनै नेतृत्वमा कराँतेको टोली लगनखेल पुगेर आर्थिक सहयोग संकलन गरेको थियो ।