प्रधानसेनापतिको हातमा क्लब लाईसेन्सको प्रमाणपत्र

काठमाडौं । अखिल नेपाल फुटबल संघ (एन्फा)ले त्रिभुवन आर्मी फुटबल क्लबलाई एएफसीको क्लब लाईसेन्सिङको प्रमाण पत्र हस्तान्तरण गरेको छ ।

आर्मी हेडक्वार्टरमा बुधबार आयोजित एक औपचारिक कार्यक्रमका बीच एन्फाले आर्मीलाई क्लब लाईसेन्सिङको प्रमाणपत्र हस्तान्तर गरेको हो ।

प्रधानसेनापति पूर्ण चन्द्र थापा स्वयम उपस्थित भए एएफसीको क्लब लाईसेन्सको प्रमाणपत्र बुझेका थिए । उनलाई एन्फा अध्यक्ष कर्माछिरिङ शेर्पाले प्रमाणपत्र हस्तान्तरण गरे ।

एएफसीको क्लब लाईसेन्स प्राप्त गर्ने विभागीय टिम आर्मी पहिलो फुटबल क्लब हो ।

लाईसेन्सका लागि आवश्यक मापदण्ड पुरा गरेपछि आर्मीले एएफसीको लाईसेन्स प्राप्त गरेको हो ।

एएफसीले क्लब लाईसेन्स लागु गर्ने नीति अख्तियार गरेपछि ब्यवसायीक फुटबलमा विभागीय टिमको भविष्य अन्यौलमा परेको थियो ।

तर विभागीय टिम आर्मी आफै अग्रसर भएर फुटबलमा ब्यवसायीक रुपमा अघि बढ्ने प्रतिबद्धता जनाउँदै एएफसीका सम्पूर्ण मापदण्ड पुरा गरेको हो ।

सोही अनुसार आर्मीले राष्ट्रिय खेलकुद परिषद् (राखेप)मा बेग्लै फुटबल क्लब दर्ता गरेको थियो ।

यसअघि आर्मीले त्रिभुवन आर्मी क्लबबाट फुटबल लगायतका अन्य खेलहरु समेत खेल्दै आएको थियो ।

एएफसीले लाईसेन्सका लागि बेग्लै क्लब दर्ता र विधान आवश्यक रहेको बताएको थियो । सोही अनुसार आर्मीले राखेपमा बेग्लै फुटबल क्लब दर्ता गरेर एएफसीका सम्पुर्ण मापदण्ड पुरा गरेको थियो ।

आर्मीले सम्पुर्ण मापदण्ड पुरा गरेपछि एन्फाले एएफसी समक्ष लाईसेन्सका लागि आर्मीलाई सिफारिस गरेको हो ।

आर्मी एएफसीको क्लब लाईसेन्स पाउने नेपालको पहिलो क्लब बनेको छ ।

लाईसेन्स प्राप्त गरेसंगै एएफसीका आधिकारिक प्रतियोगितामा आर्मीले सहभागीता जनाउने बाटो खुलेको छ ।

लाईसेन्स नहुँदा गत वर्षको लिग विजेताको रुपमा मछिन्द्रले एएफसीको प्रतियोगिता खेल्नबाट बञ्चित बनेको छ । मछिन्द्रको अनुपस्थितीमा आर्मीले अब एएफसी कपमा नेपालको प्रतिनिधित्व गर्नेछ ।

आर्मीले प्राप्त गरेको सफलतामा प्रधानसेनापति आफै उपस्थित भएर प्रमाणपत्र बुझेका हुन् ।

पछिल्लो समय आर्मीलाई थप ब्यवसायीक र पारदर्शी बनाउने अभियानको नेतृत्व गरेका प्रधानसेनापतिले फुटबललाई समेत ब्यवसायीक रुपमा अघि बढाउने कदममा महत्वपुर्ण सफलता हात पारेका छन् ।